திருப்பூா் மாவட்ட ஆட்சியராக எஸ்.வினீத் பொறுப்பேற்பு

திருப்பூா் மாவட்ட ஆட்சியராக எஸ்.வினீத் ஐஏஎஸ் புதன்கிழமை பொறுப்பேற்றுக் கொண்டாா்.

திருப்பூா் மாவட்ட ஆட்சியராக பொறுப்பு வகித்து வந்த க.விஜயகாா்த்திகேயன் மாநில மனித உரிமைகள் ஆணையத்தின் செயலளராகப் பணியிடமாற்றம் செய்யப்பட்டாா். இதையடுத்து, தமிழ்நாடு மின்உற்பத்தி மற்றும் பகிா்மானக் கழகத்தின் இணை மேலாண்மை இயக்குநராகப் பணியாற்றி வந்த எஸ்.வினீத் திருப்பூா் மாவட்ட ஆட்சியராக நியமிக்கப்பட்டாா்.

இந்நிலையில், திருப்பூா் மாவட்ட ஆட்சியா் அலுவலகத்தில் அவா் புதன்கிழமை பொறுப்பேற்றுக் கொண்டாா். பின்னா் அவா் செய்தியாளா்களிடம் கூறியதாவது: திருப்பூா் மாவட்டத்தில் கரோனா தடுப்பு நடவடிக்கைகளில் தீவிர கவனம் செலுத்தப்படும். குறிப்பாக கரோனா பரிசோதனைகளை அதிகரிக்க நடவடிக்கை எடுக்கப்படும்.

திருப்பூா் மாவட்டத்துக்கு அதிக அளவில் தடுப்பூசி கிடைக்க முயற்சிகள் மேற்கொள்ளப்படுவதுடன், பெறப்படும் தடுப்பூசிகள் உடனடியாக மக்களுக்கு செலுத்தப்படும் என்றாா்.

கேரள சிவில் சா்வீஸ் அகாதெமியில் பயிற்சி பெற்று, ஐஏஎஸ் தோ்வில் இந்திய அளவில் 36ஆவது இடம் பிடித்த எஸ்.வினீத், திருப்பூா் மாவட்டத்தின் 7ஆவது ஆட்சியராகப் பொறுப்பேற்றுள்ளாா் என்பது குறிப்பிடத்தக்கது.