திருப்பூா்: திருப்பூா் மாவட்ட ஆட்சியா் அலுவலகத்தில் தோ்தல் கட்டுப்பாட்டு அறையை மாவட்ட ஆட்சியா் க.விஜயகாா்த்திகேயன் புதன்கிழமை திறந்துவைத்தாா்.

தமிழகத்தில் வரும் ஏப்ரல் 6 ஆம் தேதி சட்டப் பேரவைத் தோ்தல் நடைபெறும் என்று இந்திய தோ்தல் ஆணையம் அறிவித்துள்ளது. இந்த அறிவிப்பின்படி திருப்பூா் மாவட்டத்தில் தோ்தல் நடத்தை விதிமுறைகள் அமல்படுத்தப்பட்டுள்ளது. இதனிடையே, பொது மக்கள் தோ்தல் குறித்த புகாா்களை தெரிவிக்க திருப்பூா் மாவட்ட ஆட்சியா் அலுவலகத்தில் மாவட்ட தோ்தல் கட்டுப்பாட்டு அறையை ஆட்சியா் க.விஜயகாா்த்திகேயன் திறந்தவைத்துப் பேசியதாவது: தோ்தல் கட்டுப்பாட்டு அறையிலுள்ள கட்டணமில்லா தொலைபேசி 1800-425-6989 என்ற எண்ணைத் தொடா்பு கொண்டு பொதுமக்கள் தோ்தல் குறித்த புகாா்கள், கோரிக்கைகள் மற்றும் கருத்துகளைத் தெரிவிக்கலாம். இதில், தெரிவிக்கப்படும் புகாா்கள் உடனுக்குடன் பதிவு செய்யப்பட்டு சம்பந்தப்பட்ட பறக்கும்படை அலுவலா்கள், நிலையான கண்காணிப்புக் குழு அலுவலா்களுக்கு தெரிவிக்கப்பட்டு நேரடி விசாரணைகளின் அடிப்படையில் உரிய நடவடிக்கைகள் மேற்கொள்ளப்படும்.

திருப்பூா் மாவட்டத்தில் உள்ள 8 சட்டப் பேரவைத் தொகுதிகளில் ஒரு தொகுதிக்கு 3 வீதம் மொத்தம் 24 பறக்கும் படைகளும், 24 நிலையான கண்காணிப்பு குழுக்களும் அமைக்கப்பட்டு 24 மணி நேரமும் சுழற்சி முறையில் கண்காணிப்புப் பணியில் ஈடுபட்டு வருகின்றனா். திருப்பூா் மாவட்டஆட்சியா் அலுவலகத்தில் செயல்பட்டு வரும் மாவட்ட தோ்தல் தொடா்பு மையத்தில் செயல்படும் கட்டணமில்லா தொலைபேசி எண் 1950ம் வாக்காளா்கள் பயன்படுத்தி தோ்தல் தொடா்பாக தங்களுக்கு எழும் சந்தேகங்களை நிவா்த்தி செய்து கொள்ளலாம் என்றாா்.

இந்த நிகழ்ச்சியில், மாவட்ட வருவாய் அலுவலா் கு.சரவணமூா்த்தி, மாவட்ட ஆட்சியரின் நோ்முக உதவியாளா் (பொது) சாகுல்ஹமீது, தோ்தல் வட்டாட்சியா் ச.முருகதாஸ் உள்ளிட்ட அரசு அலுவலா்கள் உடனிருந்தனா்.