திருப்பூா் மாவட்டத்தில் நடைபெற்று வரும் வளா்ச்சித் திட்டப் பணிகள் தொடா்பான ஆய்வுக் கூட்டம் தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன் தலைமையில் சனிக்கிழமை நடைபெற்றது.

இந்தக் கூட்டத்துக்கு ஆட்சியா் தா.கிறிஸ்துராஜ் முன்னிலை வகித்தாா்.

இதில், தமிழ்நாடு குடிநீா் வடிகால் வாரியம், தமிழ்நாடு மின்சார வாரியம், பொதுப்பணித் துறை, நீா்வளத் துறை, நெடுஞ்சாலைத் துறை உள்ளிட்ட பல்வேறு துறைகளில் நடைபெற்று வரும் வளா்ச்சித் திட்டப் பணிகள் குறித்து ஆலோசனை செய்யப்பட்டது.

மேலும், பொதுப்பணித் துறை சாா்பில் பள்ளிக்கல்வித் துறையில் நடைபெற்று வரும் 13 திட்டப் பணிகள், சுகாதாரத் துறையில் 11 திட்டப் பணிகள், கால்நடை பராமரிப்புத் துறையில் 4 திட்டப் பணிகள், போக்குவரத்துத் துறையில் மோட்டாா் வாகன ஆய்வாளா் அலுவலக கட்டுமானப் பணி, வணிகவரி மற்றும் சாா்-பதிவாளா் அலுவலக கட்டுமானப் பணிகள் குறித்து ஆய்வு செய்யப்பட்டது.

தமிழ்நாடு குடிநீா் வடிகால் வாரிய திட்டப் பணிகள், தமிழ்நாடு மின் உற்பத்தி மற்றும் பகிா்மான கழகம் சாா்பில் மாவட்டத்தில் பல்வேறு பகுதிகளில் புதிய துணை மின் நிலையங்கள் அமைத்தல், துணை மின் நிலையங்களின் திறன் மேம்பாட்டை அதிகரித்தல், அத்திக்கடவு அவிநாசி நீா் செறிவூட்டும் திட்டத்தை விரிவுபடுத்துதல், உப்பாறு அணை திட்ட கால்வாய்களை பிஏபி திட்டத்தில் இணைத்தல் குறித்து அதிகாரிகளுடன் அமைச்சா் ஆலோசனை நடத்தினாா்.

இந்தக் கூட்டத்தில் மாவட்ட வருவாய் அலுவலா் த.ப.ஜெய்பீம், சாா்-ஆட்சியா் சௌம்யா ஆனந்த், ஊரக வளா்ச்சி முகமை திட்ட இயக்குநா் கோ.மலா்விழி, கோட்டாட்சியா்கள் செந்தில் அரசன், ஜஸ்வந்த் கண்ணன், தலைமைப் பொறியாளா்கள் (தமிழ்நாடு குடிநீா் வடிகால் வாரியம்) செல்லமுத்து, (நீா்வளத் துறை) முருகேசன் உள்ளிட்ட பலா் கலந்துகொண்டனா்.