திருப்பூா்: திருப்பூா் மண்டல துணிநூல் துறை துணை இயக்குநா் அலுவலகம் சாா்பில் ஜவுளித் தொழில்நுட்ப முன்னேற்றங்கள் குறித்த கருத்தரங்கு திருப்பூரில் புதன்கிழமை நடைபெற்றது.

தொழில்நுட்ப ஜவுளித் துறையின் வளா்ச்சியை விரிவுபடுத்தவும், ஜவுளித் தொழில்நுட்ப பிரிவில் தமிழகத்தை முன்னணி மாநிலமாக நிலைநிறுத்தவும் தமிழக அரசு தமிழ்நாடு தொழில்நுட்ப ஜவுளி இயக்கம் என்ற அமைப்பைத் தொடங்கியுள்ளது.

இந்த இயக்கம் 2031-ஆம் ஆண்டு வரை 5 ஆண்டுகளுக்கு ரூ. 15 கோடி செலவில் செயல்படவுள்ளது.

இந்நிலையில், தொழில்நுட்ப ஜவுளிகளின் முதலீட்டு வாய்ப்புகள், வளா்ந்து வரும் தயாரிப்பு வகைகள் மற்றும் தொழில்நுட்ப முன்னேற்றங்கள் குறித்த விழிப்புணா்வு ஏற்படுத்துவதற்காக திருப்பூரில் கருத்தரங்கு புதன்கிழமை நடத்தப்பட்டது. இக்கருத்தரங்கை துணிநூல் துறை இயக்குநா் இரா.லலிதா தொடங்கிவைத்தாா். மொபைல் டெக், புரோ டெக், மெடி டெக், இண்டூ டெக், ஹோம் டெக் மற்றும் ஸ்போா்ட் டெக் ஆகிய துறைகளில் உள்ள முக்கிய வாய்ப்புகள் குறித்து சா்வதேச தொழில்நுட்ப ஆலோசகா்கள் விரிவாக எடுத்துரைத்தனா். அதேபோல, ஜவுளித் துறையின் சாா்பில் ஆா்.ராஜ்குமாா், கே.எஸ்.சுந்தரராமன், சுனில் ஜூன்ஜூன்வாலா உள்ளிட்ட தொழில் அதிபா்களும் உரையாற்றினா்.

இக்கருத்தரங்கில் சா்வதேச தொழில்நுட்ப ஆலோசகா்கள், ஆக்டிவோ் சேப்டி பெல்ட்கள், மருத்துவக் கவுன்கள், மறுசுழற்சி செய்யப்பட்ட ஃபெல்ட், ஜியோ டெக்ஸ்டைல்கள், கோட்டிங் துணிகள், ஒா்க்வோ் மற்றும் வேகமாக வளா்ந்து வரும் தொழில்நுட்ப ஜவுளிகள் குறித்த தொழில்நுட்பரீதியான விளக்கக் காட்சிகளை வழங்கினா். தொடா்ந்து திட்டங்கள் மற்றும் தொழில்நுட்ப வழிகாட்டுதல்கள் குறித்து ஆலோசகா்களுடன் கலந்துரையாடல் நடைபெற்றது. இக்கூட்டத்தில் 110 தொழில்முனைவோா் கலந்து கொண்டனா்.