கட்டடத் தொழிலாளி கொலை வழக்கில் மனைவி, மகன்கள், மகள் என 4 பேரை போலீஸாா் கைது செய்தனா்.

தருமபுரி வேடியப்பன்திட்டு பகுதியைச் சோ்ந்த கட்டடத் தொழிலாளி தங்கராஜ் (40). இவா், கடந்த ஜன.17-ஆம் தேதி இரவு உறங்கச் சென்றவா் அடுத்த நாள் வெகுநேரமாகியும் விழித்தெழவில்லையாம். இதையடுத்து, அவரது மனைவி வனிதா (39) அப்பகுதியில் இருந்தவா்கள் உதவியுடன் தங்கராஜை மீட்டு தருமபுரி அரசு மருத்துவக் கல்லூரி மருத்துவமனைக்கு கொண்டு சென்றாா். அங்கு அவரை பரிசோதித்த மருத்துவா்கள் அவா் உயிரிழந்துவிட்டதாக தெரிவித்தனா். தொடா்ந்து நடைபெற்ற பிரேத பரிசோதனையில் அவரை கொலை செய்திருப்பது தெரியவந்தது.

இதுகுறித்த புகாரின் பேரில், தருமபுரி நகர போலீஸாா் வழக்குப் பதிவு செய்து விசாரணை நடத்தினா். இதில், உயிரிழந்த தங்கராஜ், மது அருந்தி நாள்தோறும் குடும்பத்தினருடம் தகராறு செய்து வந்தாராம். இதேபோல, கடந்த 17-ஆம் தேதி மனைவி மற்றும் குடும்பத்தினருடன் தகராறில் ஈடுபட்டுள்ளாா். அப்போது, அவரது மனைவி வனிதா அவரது மகன்கள் உதவியுடன் கணவரை கொலை செய்தது தெரியவந்தது.

இதுதொடா்பாக வனிதா மற்றும் அவரது இரு மகன்கள், ஒரு மகள் உள்ளிட்ட நால்வரையும் போலீஸாா் கைது செய்து விசாரணை நடத்தி வருகின்றனா்.