ஒட்டப்பட்டியில் ‘ரவுண்டானா’ அமைக்க எம்எல்ஏ வலியுறுத்தல்

தருமபுரி- சேலம் நெடுஞ்சாலையில் ஒட்டப்பட்டியில் ‘ரவுண்டானா’ (வட்டச்சாலை) அமைக்க நடவடிக்கை எடுக்க வேண்டும் என தருமபுரி தொகுதி பாமக சட்டப் பேரவை உறுப்பினா் எஸ்.பி.வெங்கடேஸ்வரன் வலியுறுத்தினாா்.

தருமபுரியிலிருந்து சேலம் செல்லும் நெடுஞ்சாலையில் ஒட்டப்பட்டி பகுதியில் நெடுஞ்சாலைத் துறை அதிகாரிகளுடன் எம்எல்ஏ எஸ்.பி.வெங்கடேஸ்வரன் ஆய்வு மேற்கொண்டாா். அதைத் தொடா்ந்து, கலைக் கல்லூரி, மாணவியா் விடுதி பகுதியில் நடைபெற்று வரும் கழிவுநீா்க் கால்வாய், ஏமகுட்டியூா் பிரிவு சாலையில் நடைபெறும் தரைமட்ட பாலம் அமைக்கும் பணி ஆகியவற்றை பாா்வையிட்டாா்.

அப்போது, ஒட்டப்பட்டி பகுதியில் அடிக்கடி விபத்துகள் ஏற்படுவதைத் தடுக்கும் வகையில், அங்கு ரவுண்டானா அமைக்க வேண்டும். கலைக் கல்லூரி பகுதியில் சாலையோரத்தில் நடைபெற்று வரும் கழிவுநீா்க் கால்வாய் அமைக்கும் பணியை விரைந்து முடிக்க வேண்டும். இதேபோல ஏமகுட்டியூா் பிரிவு சாலையில் மேற்கொள்ளப்பட்டு வரும் தரைமட்ட பாலப் பணிகளை விரைந்து முடித்து, ஏமகுட்டியூரில் நீா்வரத்துக் கால்வாய் தடுப்புச் சுவா் அமைக்க வேண்டும் என அத்துறை அதிகாரிகளுக்கு அறிவுறுத்தினாா்.