தருமபுரியில் ஏற்றுமதி சாா்ந்த தொழில் தொடங்க சாத்தியக் கூறுகள் உள்ளன

தருமபுரியில் ஏற்றுமதி சாா்ந்த அனைத்து தொழில்களும் தொடங்க சாத்தியக் கூறுகள் உள்ளன என மாவட்ட ஆட்சியா் ச.திவ்யதா்சினி தெரிவித்தாா்.

தருமபுரி மாவட்ட ஆட்சியா் அலுவலகக் கூட்டரங்கில், மாவட்ட இளம் தொழில்முனைவோா், தொழிலதிபா்கள், ஏற்றுமதியாளா்கள் விழிப்புணா்வுக் கருத்தரங்கம் வெள்ளிக்கிழமை நடைபெற்றது.

இக்கருத்தரங்கிற்கு சட்டப் பேரவை உறுப்பினா் எஸ்.பி.வெங்கடேஸ்வரன் முன்னிலை வகித்து பேசினாா். இதில், மாவட்ட ஆட்சியா் ச.திவ்யதா்சினி தலைமை வகித்து பேசியதாவது:

தருமபுரி மாவட்டத்தில் வேளாண், தோட்டக்கலைத் தொழில் வளங்கள் நிறைந்துள்ளன. இந்த மாவட்டத்தில் ஏற்றுமதி செய்யும் அளவிற்கு தொழில் தொடங்க அனைத்து சாத்தியக் கூறுகளும் நிறைந்துள்ளன. வேலைவாய்ப்புகளை பெருக்கவும், தொழில் வளங்களை மேம்படுத்திடவும் மத்திய, மாநில அரசுகள் பல்வேறு திட்டங்களை செயல்படுத்தி வருகின்றன. இத் திட்டங்களை படித்த வேலைவாய்ப்பற்றோா், இளம் தொழில்முனைவோா் உள்ளிட்ட அனைவரும் பயன்படுத்திக்கொள்ள வேண்டும்.

இத் திட்டங்கள் மூலம் தகுதியுடைய அனைவரும் புதிய தொழில்களை தொடங்கி தொழில்முனைவோா் ஆகலாம். இதன் மூலம் மற்றவா்களுக்கும் வேலைவாய்ப்பு வழங்கிடலாம்.

புதிய தொழில்களை தொடங்கும் போது, தங்கள் பகுதியில் உள்ள தொழில் வளம் சாா்ந்த தொழில்களை தொடங்கினால் அது லாபகரமானதாக அமையும். குறிப்பாக, வேளாண் சாா்ந்த தொழில்களை மேம்படுத்த தமிழக அரசு 1000 விவசாயிகளை ஒருங்கிணைத்து விவசாயிகள் உற்பத்தி நிறுவனம் என்ற திட்டத்தைச் செயல்படுத்தி வருகிறது. இதன் மூலம் விவசாயிகள் உற்பத்தி செய்யும் வேளாண் பொருள்களை லாபகரமான முறையில் சந்தைப்படுத்த இயலும்.

தருமபுரி மாவட்டத்தில் இதுவரை 23 விவசாயிகள் உற்பத்தி நிறுவனம் தொடங்கப்பட்டு சிறப்பாக செயல்பட்டு வருகின்றன.

புதிய தொழில்களை தொடங்கும் தொழில்முனைவோா் அனைவரும் தங்கள் உற்பத்தி பொருள்களை தரமான முறையில் உற்பத்தி செய்யவேண்டும். மாம்பழம், தக்காளி போன்ற பழ வகைகள் அதிக அளவில் சாகுபடி செய்யப்படுகின்றன. இப்பொருள்களின் மீதான விலை குறையும் போது ஏற்படும் இழப்பீட்டை தவிா்க்க அவற்றை மதிப்பு கூட்டப்பட்ட பொருள்களாக மாற்றிச் சந்தைப்படுத்த வேண்டும். இதன் மூலம் அனைத்து நேரங்களிலும் அதிக லாபம் ஈட்ட முடியும்.

தருமபுரி மாவட்டத்தில் தொழில் வளத்தை மேம்படுத்தவும், வேலைவாய்ப்புகளை பெருக்கவும் சிப்காட் அமைக்கும் பணி தீவிரமாக நடைபெற்று வருகிறது. இதுகுறித்து மாநில அரசு நிதிநிலை அறிக்கையில் தருமபுரி மாவட்டத்தில் புதிய சிப்காட் அமைக்கப்படும் என தெரிவித்துள்ளது. இதற்காக நிலம் எடுக்கும் பணிகள் நடைபெற்று வருகின்றன. பணிகள் முடிவடைந்து விரைவில் சிப்காட் தொடங்கப்படும். சேலம் - கிருஷ்ணகிரி தேசிய நெடுஞ்சாலையின் அருகில் இந்த சிப்காட் அமையவுள்ளது. இதனால் சாலை வசதி உள்ளிட்ட அனைத்து அடிப்படை வசதிகளும் கிடைக்கும் என்றாா்.

இதைத் தொடா்ந்து, தொழில் மேம்பாட்டுத் திட்டத்தின் கீழ், பொக்லைன் வாகனங்கள் வாங்குவதற்கு 6 பயனளிகளுக்கு ரூ. 2.61 கோடிக்கான காசோலைகள், படித்த வேலைவாய்ப்பற்ற இளைஞா்களுக்கு வேலை வாய்ப்பு உருவாக்கும் திட்டத்தின்கீழ், சாக்லேட், மாட்டுத் தீவன வியாபாரம், பிளாஸ்டிக் பொருள்கள் விற்பனை, மளிகைக் கடை நடத்துதல், தையல் தொழில் மேற்கொள்ளுதல் மற்றும் ஆயத்த ஆடை தயாரித்தல் ஆகியவற்றிற்கு 6 பயனளிகளுக்கு தலா ரூ. 5 லட்சம் வீதம் ரூ.30 லட்சத்துக்கான காசோலைகள் என மொத்தம் 12 பயனாளிகளுக்கு ரூ. 2.91 கோடிக்கான காசோலைகளை வழங்கப்பட்டன.

இக் கருத்தரங்கில், மாவட்ட தொழில் மைய பொது மேலாளா் கே.எஸ்.அசோகன் வரவேற்று பேசினாா். சிறு, குறு மற்றும் நடுத்தர தொழில் நிறுவனங்கள் துணை இயக்குநா் ஆா்.செந்தில்குமாா், முன்னோடி வங்கி மேலாளா் கே.கண்ணன், நபாா்டு வங்கி துணை பொது மேலாளா் எஸ்.பிரவின்பாபு, உதவி இயக்குநா் (இந்திய ஏற்றுமதியாளா்கள் கூட்டமைப்பு) ஜெயக்குமாா், தருமபுரி மாவட்ட சிறு, குறு மற்றும் நடுத்தர தொழில் கூட்டமைப்புத் தலைவா் சரவணன் உள்ளிட்டோா் கலந்துகொண்டனா்.