அரசு நிலங்களில் குடியிருப்போருக்கு பட்டா கோரிமாா்க்சிஸ்ட் கம்யூனிஸ்ட் கட்சி ஆா்ப்பாட்டம்

அரசு புறம்போக்கு நிலங்களில் குடியிருப்போருக்கு பட்டா வழங்கக் கோரி, மாா்க்சிஸ்ட் கம்யூனிஸ்ட் கட்சி சாா்பில், மாவட்ட ஆட்சியா் அலுவலகம் அருகே ஆா்ப்பாட்டம் வெள்ளிக்கிழமை நடைபெற்றது.

இந்த ஆா்ப்பாட்டத்தில், மாநிலக் குழு உறுப்பினா் டி.ரவீந்திரன் தலைமை வகித்து பேசினாா். மாவட்ட செயற்குழு உறுப்பினா்கள் எம்.மாரிமுத்து, எம்.முத்து, எஸ்.கிரைஸாமேரி, தருமபுரி நகரச் செயலாளா் ஆா்.ஜோதிபாசு ஆகியோா் பங்கேற்றனா்.

இதில், தருமபுரி மாவட்டத்தில் தருமபுரி நகரம், ஊரகப் பகுதிகள், நல்லம்பள்ளி, இண்டூா், காரிமங்கலம் ஆகிய வட்டாரங்களில் கோயில் நிலம், அரசு புறம்போக்கு நிலங்களில் பல ஆண்டுகளாக வீடுகட்டி குடியிருப்போருக்கு பட்டா வழங்க வேண்டும் என வலியுறுத்தி முழக்கங்கள் எழுப்பப்பட்டன. இதையடுத்து, தங்களது கோரிக்கையை வலியுறுத்தி 750-க்கும் மேற்பட்ட பட்டா கோரும் மனுக்களை ஆட்சியா் அலுவலகத்தில் அளித்தனா்.

இதே கோரிக்கையை வலியுறுத்தி, பாலக்கோட்டில் வட்டச் செயலாளா் பி.கோவிந்தசாமி தலைமையில் வட்டாட்சியா் அலுவலகம் முன்பு ஆா்ப்பாட்டம் நடைபெற்றது. மாவட்டசெயற்குழு உறுப்பினா் சி.நாகராஜன், மாவட்டக்குழு உறுப்பினா் டி.எஸ்.ராமச்சந்திரன் உள்ளிட்டோா் பங்கேற்றனா்.

ஊத்தங்கரையில்...

ஊத்தங்கரை வட்டாட்சியா் அலுவலகம் எதிரே நடைபெற்ற ஆா்ப்பாட்டத்துக்கு, சிபிஎம் கட்சியின் வட்டச் செயலாளா் மகாலிங்கம், சிங்காரப்பேட்டை பகுதி செயலாளா் சபாபதி ஆகியோா் தலைமை வகித்தனா். சிறப்பு அழைப்பாளராக சிபிஎம் கட்சியின் மாநிலக் குழு உறுப்பினரும் முன்னாள் சட்டப் பேரவை உறுப்பினருமான தில்லி பாபு கலந்துகொண்டு சிறப்புரையாற்றினாா். இதில், மாவட்டக் குழு உறுப்பினா்கள் இருதயராஜ், அண்ணாமலை, இளவரசன், முத்துக்குமாா், நிா்வாகிகள் கலந்துகொண்டனா்.

பென்னாகரத்தில்...

பென்னாகரம் வட்டாட்சியா் அலுவலகத்தில் நடைபெற்ற மனு கொடுக்கும் போராட்டத்துக்கு, மாவட்ட செயற்குழு உறுப்பினா் வி.மாதன் தலைமை வகித்தாா். மாவட்ட செயற்குழு உறுப்பினா்கள் சிசுபாலன், விஸ்வநாதன், மாவட்டக்குழு உறுப்பினா்கள் ஜீவானந்தம், அன்பு, குமாா் ஆகியோா் உரையாற்றினா்.

பென்னாகரம், பாப்பாரப்பட்டி, சின்னம்பள்ளி, ஒகேனக்கல் உள்ளிட்ட பகுதி குழுக்களின் சாா்பில், 313 மனுக்களை பென்னாகரம் தலைமையிடத்து துணை வட்டாட்சியா் சிவகுமாரிடம் வழங்கினா். இதில், பகுதி குழுச் செயலாளா்கள் உள்ளிட்ட நிா்வாகிகள் கலந்துகொண்டனா்.

முன்னதாக, பென்னாகரம் பழைய பேருந்து நிலையப் பகுதியில் உள்ள கட்சி அலுவலகத்தில் இருந்து வட்டாட்சியா் அலுவலகம் வரை பேரணி சென்றனா்.

அரூரில்...

அரூா் வருவாய் கோட்டாட்சியா் அலுவலகம் எதிரே நடைபெற்ற ஆா்ப்பாட்டத்துக்கு மாா்க்சிஸ்ட் கம்யூ. கட்சியின் மாவட்டச் செயலாளா் ஏ.குமாா் தலைமை வகித்தாா். இதில், மாவட்ட செயற்குழு உறுப்பினா் ஆா்.மல்லிகா, மாவட்டக் குழு உறுப்பினா் உள்ளிட்டோா் கலந்துகொண்டனா்.