கிருஷ்ணகிரி மாவட்ட குழந்தை பாதுகாப்பு அதிகாரிகளுடன், தமிழ்நாடு குழந்தை உரிமைகள் பாதுகாப்பு ஆணைய உறுப்பினா் வீ.ராமராஜ், சனிக்கிழமை ஆலோசனை மேற்கொண்டாா்.

கிருஷ்ணகிரி மாவட்டம், ஒசூா், தேன்கனிக்கோட்டை, கிருஷ்ணகிரி, பா்கூா் உள்ளிட்ட வட்டாரங்களில் உள்ள குழந்தைகள் காப்பகங்களில் தமிழ்நாடு மாநில குழந்தை உரிமைகள் பாதுகாப்பு ஆணைய உறுப்பினா் வீ.ராமராஜ், கடந்த இரு நாள்களாக ஆய்வு மேற்கொண்டாா்.

ஆய்வின்போது, மாவட்டத்தில் இயங்கி வரும் குழந்தைகள் பாதுகாப்பு இல்லங்களில் உள்ள குழந்தைகளை சந்தித்து உரையாடினாா். இதைத்தொடா்ந்து மாவட்ட குழந்தைகள் பாதுகாப்பு அலகு அலுவலகத்தில், தற்போது நடைபெற்று வரும் பணிகள் குறித்து அலுவலா்களிடம் அவா் கேட்டறிந்தாா்.

மாவட்ட குழந்தைகள் நலக் குழு தலைவா் கலைவாணி மற்றும் உறுப்பினா்களோடு சனிக்கிழமை ஆலோசனை மேற்கொண்டாா். இந்த ஆய்வுகளின்போது மாவட்ட கூடுதல் காவல் கண்காணிப்பாளா் ராஜூ, மாவட்ட குழந்தை பாதுகாப்பு அலகின் அலுவலா்கள் சுபாஷ், கஸ்தூரி ஆகியோா் உடனிருந்தனா்.

பின்னா் ஆணைய உறுப்பினா் ராமராஜ் தெரிவித்ததாவது:

கடந்த சட்டப் பேரவைக் கூட்டத் தொடரில் தமிழகத்தில் சேவை உரிமைச் சட்டம் கொண்டு வரப்படும் என்றும், லோக் ஆயுக்த சட்டம் வலுப்படுத்தப்படும் என்றும் ஆளுநா் உரையில் தெரிவிக்கப்பட்டது. சேவை உரிமைச் சட்டம் நிறைவேற்றப்பட்டால் குழந்தைகளின் உரிமைகளைப் பாதுகாப்பதில் பெரும் உதவிகரமாக இருக்கும். லோக் ஆயுக்த சட்டம் வலுப்படுத்தப்படும்போது குழந்தைகள் தொடா்பான விவகாரங்களில் சிறந்த நிா்வாகம் ஏற்படும் என்றாா்.