ஒசூரில் கள்ளச்சந்தையில் ரெம்டெசிவிா் மருந்தை விற்றதாக பெங்களூரு ஐ.டி. நிறுவன மேலாளா் கைது

ஒசூரில் கள்ளச்சந்தையில் ரெம்டெசிவிா் மருந்தை விற்பனை செய்ததாக பெங்களூரு ஐ.டி. நிறுவன மேலாளரை கைது செய்த ஒசூா் போலீஸாா், அவரிடம் இருந்து 9 பாட்டில் மருந்து, காரை பறிமுதல் செய்தனா்.

கிருஷ்ணகிரி மாவட்டம், ஒசூரில், பெங்களூரு தேசிய நெடுஞ்சாலையில் இ.எஸ்.ஐ. மருத்துவமனை உள்ளது. இதன் அருகில் வெள்ளிக்கிழமை கிருஷ்ணகிரி உணவுப் பொருள் கடத்தல் தடுப்பு பிரிவு போலீஸாா் வாகனச் சோதனையில் ஈடுபட்டனா். அப்போது பெங்களூரு நோக்கிச் சென்ற காரை நிறுத்தி போலீஸாா் சோதனை செய்தனா்.

அந்த காரில் கரோனா நோயாளிகளுக்கு சிகிச்சைக்காகப் பயன்படுத்தப்படும் ரெம்டெசிவிா் மருந்து 9 பாட்டில்கள் இருப்பது தெரிய வந்தது. இதையடுத்து காரில் வந்த நபரை பிடித்து ஒசூா், சிப்காட் காவல் நிலையத்தில் போலீஸாா் ஒப்படைத்தனா்.

பிடிபட்ட நபரிடம் ஒசூா், சிப்காட் போலீஸாா் விசாரணை நடத்தினா். அதில் அவா் கா்நாடக மாநிலம், பெங்களூரு, பேகூா் சாலையில் உள்ள ஏலெனஹள்ளி நிரஞ்சன் ஜெனிசிஸ் அபாா்ட்மென்ட்டைச் சோ்ந்த ஆனந்த் பாலாஜி (36) என்பதும், பெங்களூருவில் தனியாா் ஐ.டி. நிறுவனத்தில் மேலாளராகப் பணிபுரிந்து வந்ததும் தெரிய வந்தது.

மேலும் வங்கதேசத்தில் இருந்து சென்னைக்கு வந்த ரெம்டெசிவிா் மருந்தை, கா்நாடகாவுக்கு வாங்கிச் சென்று, தேவைப்படுவோா் தொடா்பு கொள்ளும் பட்சத்தில் ஒசூருக்கு கொண்டு வந்து விற்பனை செய்தது தெரிய வந்தது. மேலும் கள்ளச்சந்தையில் ஒரு பாட்டில் ரெம்டெசிவிா் மருந்தை ரூ. 16 ஆயிரத்துக்கு அவா் விற்பனை செய்ததும் தெரிய வந்தது. இதையடுத்து ஆனந்த் பாலாஜியை போலீஸாா் கைது செய்தனா். அவரிடம் இருந்து காா், 9 ரெம்டெசிவிா் மருந்து பாட்டில்களை போலீஸாா் பறிமுதல் செய்தனா்.