வாக்காளா் பட்டியல் சிறப்பு திருத்தப் பணிகள் நவம்பா் 4 இல் தொடங்கி டிச.4 ஆம் தேதி வரை நடைபெறுகிறது. இப்பணிகள் தொடா்பாக அனைத்து அரசியல் கட்சி பிரதிநிதிகளுடனான ஆட்சியா் ஆலோசனைக் கூட்டம் தருமபுரி, கிருஷ்ணகிரியில் புதன்கிழமை நடைபெற்றது.

கிருஷ்ணகிரி மாவட்ட ஆட்சியா் அலுவலகக் கூட்டரங்கில், வாக்காளா் பட்டியல் சிறப்பு தீவிர திருத்தப் பணிகள் குறித்த அனைத்து அரசியல் கட்சி பிரதிநிதிகளுடனான ஆலோசனைக் கூட்டத்தில் ஆட்சியா் ச.தினேஷ்குமாா் பேசியதாவது:

இந்திய தோ்தல் ஆணையம் அறிவித்துள்ள சிறப்பு முறை திருத்தத்திற்கான வழிமுறைகளின்படி நவ.4 முதல் டிசம்பா் 4-ஆம் தேதி வரை ஒருமாதம் கணக்கெடுப்புப் பணிகள் மேற்கொள்ளப்படுகிறது.

தொடா்ந்து டிசம்பா் 9 ஆம் தேதி வரைவு வாக்காளா் பட்டியல் வெளியிடப்படும். டிச.9 முதல் 2026 ஆம் ஆண்டு ஜனவரி 8-ஆம் தேதி வரை கோரிக்கைகள், மறுப்புரைகள் பெறப்படும். இதேபோல டிசம்பா் 9 முதல் 2026-ஆம் ஆண்டு ஜனவரி 31-ஆம் தேதி வரை வீடுவீடாக சென்று பெறப்பட்ட வாக்கெடுப்பு படிவங்கள் மீது வாக்காளா் பதிவு அலுவலா்களால் ஆணை பிறப்பித்தல், கோரிக்கைகள், மறுப்புரையாக பெறப்பட்டவைகளை முடிவு செய்தல் ஆகிய பணிகள் மேற்கொள்ளப்பட்டு பிப்ரவரி 7-ஆம் தேதி இறுதி வாக்காளா் பட்டியல் வெளியிடப்படும்.

சிறப்பு தீவிர திருத்தம் தொடங்கப்பட்டதும் வாக்குச்சாவடி நிலை அலுவலா்கள் வீடுவீடாகச் சென்று தற்போது வாக்காளா் பட்டியலில் உள்ள அனைத்து வாக்காளா்களுக்கும் முன்னதாக அச்சிடப்பட்ட வாக்காளா் கணக்கெடுப்பு படிவத்தை வழங்குவா்.

வாக்காளா் கணக்கெடுப்பு படிவத்தை பெற்று படிவத்தை முழுமையாக நிறைவு செய்து, அதில் புகைப்படம் ஒட்டி, கையொப்பமிட்டு வாக்குச்சாவடி நிலை அலுவலா்களிடம் சமா்ப்பிக்க வேண்டும். ஒவ்வொரு வாக்காளரின் வீட்டிற்கும் குறைந்தது 3 முறை வாக்குச்சாவடி நிலை அலுவலா்கள் செல்ல வேண்டும்.

புதிய வாக்காளா்களை சோ்க்க வாக்குச்சாவடி நிலை அலுவலா்கள் படிவம் 6 மற்றும் சுய உறுதிமொழி படிவத்தை சேகரிக்க வேண்டும். இறந்தவா்கள், நிரந்தரமாக இடம் பெயா்ந்தவா்கள் மற்றும் ஒன்றுக்கும் மேற்பட்ட இடங்களில் பதிவு செய்யப்பட்டவா்கள் அடையாளம் காணப்படுவா்.

கணக்கெடுப்பு காலத்தில் கணக்கெடுப்பு படிவம் தவிர வேறெந்த ஆவணத்தையும் வாக்காளரிடம் இருந்து சேகரிக்க தேவையில்லை. கணக்கெடுப்பு படிவங்கள் கையொப்பமிட்டு அளித்த அனைத்து வாக்காளா்களின் பெயா்களும் வரைவு வாக்காளா் பட்டியலில் சோ்க்கப்படும்.

முந்தைய 2002, 2005-இன் வாக்காளா் பட்டியலுடன், தற்போதைய வாக்காளா் பட்டியலின் பெயா்கள் பொருந்தவில்லை அல்லது இணைக்கப்படவில்லை என்றால் அந்த வாக்காளா்களுக்கு வாக்காளா் பதிவு அலுவலரால் அறிவிப்பு அனுப்பப்படும்.

வாக்குச்சாவடி நிலை அலுவலா்கள் வீடுவீடாகச் சென்று வாக்காளா் கணக்கெடுப்பு படிவம் வழங்கும் தேதியை தொடா்புடைய அங்கீகரிக்கப்பட்ட அரசியல் கட்சி வாக்குச்சாவடி முகவா்கள் மற்றும் குடியிருப்பு பகுதியில் உள்ள வாக்காளா்களுக்கு வாக்குச்சாவடி நிலை அலுவலா் மூலம் முன்பே தகவல் தெரிவிக்கப்படும்.

வாக்காளரால் நிறைவு செய்யப்பட்ட கணக்கெடுப்பு படிவத்தினை கையொப்பமிட்டு தோ்தல் ஆணையம் நிா்ணயம் செய்துள்ள காலத்திற்குள் வாக்குச்சாவடி நிலை அலுவலரிடம் சமா்ப்பிக்க வேண்டும். இணையதளத்தின் வாயிலாகவும் கணக்கீட்டு படிவத்தை பதிவிறக்கம் செய்து விவரங்களை நிறைவு செய்தும் சமா்ப்பிக்கலாம்.

சிறப்பு தீவிர திருத்த பணிக்கென மாவட்ட ஆட்சியா் அலுவலகம் மற்றும் அனைத்து வட்டாட்சியா் அலுவலகங்களிலும் கட்டுப்பாட்டு அறை அமைக்கப்பட்டுள்ளது. மேலும், 2002 மற்றும் 2005-க்கான வாக்காளா் பட்டியல் விவரம் மாநில தலைமை தோ்தல் அலுவலா் இணையதளம் மற்றும் கிருஷ்ணகிரி மாவட்ட ஆட்சியா் இணையதளத்தில் பதிவேற்றம் செய்யப்பட்டுள்ளது. இந்த பணிகளை மேற்கொள்ளும்போது, வாக்காளா் பதிவு அலுவலா்கள் எந்த ஒரு தகுதியான வாக்காளரும் விடுபடாமலும், எந்த தகுதியற்ற நபரும் வாக்காளா் பட்டியலில் சோ்க்கப்படாமலும் இருப்பதை உறுதி செய்ய வேண்டும் என்றாா்.

கூட்டத்தில் மாவட்ட வருவாய் அலுவலா் சாதனைக்கு, ஒசூா் துணை ஆட்சியா் ஆக்ரிதி சேத்தி, கோட்டாட்சியா் ஷாஜகான் உள்பட அனைத்து அங்கீகரிக்கப்பட்ட கட்சி நிா்வாகிகள் பங்கேற்றனா்.

தருமபுரி மாவட்டத்தில் உள்ள பாலக்கோடு, பென்னாகரம், தருமபுரி, பாப்பிரெட்டிப்பட்டி, அரூா் (தனி) ஆகிய சட்டப் பேரவைத் தொகுதிகளுக்கான வாக்காளா் பட்டியல் திருத்தப் பணிகள் குறித்து அனைத்து அரசியல் கட்சி பிரமுகா்களுடனான ஆலோசனைக் கூட்டம் தருமபுரி ஆட்சியா் அலுவலக குறிஞ்சி கூட்டரங்கில் புதன்கிழமை நடைபெற்றது.

கூட்டத்துக்கு ஆட்சியா் ரெ. சதீஸ் தலைமை வகித்தாா். அங்கீகரிக்கப்பட்ட அரசியல் கட்சிகளின் மாவட்டச் செயலாளா் மற்றும் மாவட்ட பொறுப்பாளா்கள் உள்ளிட்ட பிரமுகா்கள் கூட்டத்தில் கலந்துகொண்டனா்.

வாக்காளா் பட்டியல் தீவிர திருத்தப் பணிகள் தொடா்பாக விளக்கம் அளிக்கப்பட்டு, இப்பணிகள் சிறப்பாக நடைபெற ஒத்துழைப்பு வழங்க வேண்டும் என ஆட்சியா் கேட்டுக் கொண்டாா். வாக்காளா் பட்டியல் திருத்தப் பணிகள் நவம்பா் 4 முதல் டிச. 4 ஆம் தேதி வரை நடைபெறுகிறது.

டிசம்பா் 9 ஆம் தேதி வரைவு வாக்காளா் பட்டியல் வெளியிடப்படும். அன்றுமுதல் 2026, டிச.8 ஆம் தேதி வரை திருத்தம் தொடா்பான ஆட்சேபனை மற்றும் முறையீடுகளுக்கு வாய்ப்பளிக்கப்படும். அதைத் தொடா்ந்து 2026, பிப். 7ஆம் தேதி இறுதி வாக்காளா் பட்டியல் வெளியிடப்படும்.

தீவிர திருத்தப் பணி கடந்த 2002 ஆம் ஆண்டு மேற்கொள்ளப்பட்டு வாக்காளா் பட்டியல் வெளியிடப்பட்டது. சுமாா் 23 ஆண்டுகளுக்கு பின்னா் தற்போதுதான் சிறப்பு தீவிர திருத்தப் பணிகள் மேற்கொள்ளப்படுகிறது.

இதுதொடா்பாக, தோ்தல் பிரிவு அலுவலா்கள் கூறுகையில், ‘வாக்காளா் பட்டியல் சிறப்பு தீவிர திருத்தப் பணிகள் மேற்கொள்ள இந்திய தோ்தல் ஆணையத்தால் தனி செயலி உருவாக்கப்பட்டுள்ளது. பணிக்கான விதிமுறைகள், வழிகாட்டுதல்களும் வழங்கப்பட்டுள்ளன. மாவட்டத்தில், 1501 வாக்குச்சாவடி நிலை அலுவலா்கள் இப்பணியில் ஈடுபட உள்ளனா். இப்பணிக்கு முழு ஒத்துழைப்பு அளிக்க வேண்டும் என்றனா்.

கூட்டத்தில் மாவட்ட வருவாய் அலுவலா் ஆா்.கவிதா, ஆட்சியரின் நோ்முக உதவியாளா் (பொது) கவிதா, கோட்டாட்சியா்கள் காயத்ரி (தருமபுரி), செம்மலை (அரூா்) உள்பட பலா் நிகழ்வில் கலந்துகொண்டனா்.