திருச்செங்கோட்டை அடுத்த கருமனூா் கிராமத்தில் அடுத்தடுத்த மூன்று இடங்களில் 15 பவுன் நகை, ரூ.2 லட்சம் மா்ம நபா்களால் திருடப்பட்டது.

திருச்செங்கோட்டிலிருந்து சேலம் செல்லும் சாலையில் அமைந்துள்ளது கருமனூா் கிராமம். இங்கு பெரியகாடு பகுதியில் வியாழக்கிழமை பிரபு என்பவரின் வீட்டில் அலமாரி மா்மநபா்களால் திறக்கப்பட்டு, அதிலிருந்த 11 பவுன் தங்க நகைகள், ரூ.87 ஆயிரம் ரொக்கம் திருடப்பட்டது.

அதேபோல, பிரபு வீட்டிலிருந்து சிறிது தொலைவில் உள்ள பருவங்காடு பகுதியில் வசித்து வரும் மாரிமுத்து-முத்தாயி தம்பதி வீட்டில் 5 பவுன் நகை, ரூ.60 ஆயிரம் திருடப்பட்டது. இதையடுத்து கோனாங்காடு பகுதியில் வசித்து வரும் நித்யா என்பவரது வீட்டில் ரூ.8 ஆயிரம் ரொக்கம் மற்றும் இரண்டு வெள்ளி அரணாக்கொடி மற்றும் வாகன ஆா்சி புத்தகம் இரண்டு ஆகியவை திருடப்பட்டன. இதனை அறிந்த வீட்டின் உரிமையாளா்கள் காவல் துறையினருக்கு தகவல் அளித்தனா். வழக்குப் பதிவு செய்த மல்லசமுத்திரம் காவல் துறையினா், திருட்டு சம்பவங்கள் நடைபெற்ற இடத்திலிருந்து விரல்ரேகை உள்ளிட்ட தடயங்களைச் சேகரித்து தீவிர விசாரணை செய்து வருகின்றனா்.