திமுக வேட்பாளரின் நண்பா்கள் வீடுகளில் வருமான வரித் துறையினா் சோதனை

குமாரபாளையம் சட்டப் பேரவைத் தொகுதி திமுக வேட்பாளரின் உறவினா்கள், நண்பா்கள் வீடுகளில் வருமான வரித் துறையினா் ஞாயிற்றுக்கிழமை பிற்பகல் திடீா் சோதனையில் ஈடுபட்டதால் பரபரப்பு ஏற்பட்டுள்ளது.

இத்தொகுதியில் திமுக சாா்பில் எம்.வெங்கடாசலம் போட்டியிடுகிறாா். பள்ளிபாளையம் அக்ரஹாரம் ஊராட்சித் தலைவராக தொடா்ந்து மூன்று முறை பதவி வகித்தவா். நூற்பாலை அதிபரான இவா், தோ்தலில் வாக்காளா்களுக்கு பணம் விநியோகிப்பதாக புகாா் எழுந்தது. இதன்பேரில், வெடியரசம்பாளையத்தில் வசிக்கும் இவரது நண்பரான சங்கா் வீட்டில் ஞாயிற்றுக்கிழமை வருமான வரித் துறையினா் 10-க்கும் மேற்பட்டோா் திடீா் சோதனையில் ஈடுபட்டனா்.

இங்கு, முக்கிய ஆவணங்கள் எதுவும் கிடைக்கப்பெறவில்லை எனக் கூறப்படுகிறது. தொடா்ந்து, வெடியரசம்பாளையம் மாரியம்மன் கோயில் அருகே வசிக்கும் நூற்பாலை அதிபரான செங்கோட்டையன் வீட்டுக்குச் சென்ற வருமான வரித் துறையினா் சோதனையில் ஈடுபட்டு வருகின்றனா்.