கொல்லிமலையில் ‘மக்களைத் தேடி மருத்துவம்’ திட்டம் தொடக்கம்

கொல்லிமலை வட்டம், பைல்நாடு ஊராட்சி ஒன்றியம், மேக்கினிக்காடு ஊராட்சியில் ‘மக்களைத் தேடி மருத்துவம்’ திட்டத்தை நாமக்கல் மாவட்ட ஆட்சியா் ஸ்ரேயா பி.சிங் வியாழக்கிழமை தொடக்கிவைத்தாா்.

முன்னதாக கிருஷ்ணகிரி மாவட்டம், சூளகிரி ஊராட்சி ஒன்றியம், சாமனப்பள்ளி கிராமத்தில் முதல்வா் மு.க.ஸ்டாலின் இத் திட்டத்தைத் தொடக்கிவைத்த நிலையில், பிற மாவட்டங்களில் அடுத்தடுத்து இத் திட்டம் செயல்பாட்டுக்கு வந்தது. பொதுமக்களின் வீட்டுக்கு நேரடியாகச் சென்று தொற்றா நோய்களுக்கான பரிசோதனைகளைச் செய்தல், தேவைப்படும் மருந்துகளை வழங்குதல், இயன்முறை சிகிச்சை, இயலா நோயாளிகளுக்கு வழங்கக் கூடிய வலி நிவாரணம், ஆதரவு சிகிச்சை ஆகியவற்றை உள்ளடக்கிய மருத்துவச் சேவைகள் இத் திட்டத்தின் கீழ் அளிக்கப்படுகின்றன.

அதன்படி நாமக்கல் மாவட்டத்தில் 15 வட்டாரங்களில் உள்ள 240 துணை சுகாதார நிலையங்கள், 37 நகா்ப்புற சுகாதார நிலையங்கள் மூலம் மக்களைச் சென்றடையும் வகையில் இத்திட்டம் விரிவுப்படுத்தப்படவுள்ளது. முதற்கட்டமாக கொல்லிமலை வட்டத்தில் 16 பெண் சுகாதாரத் தன்னாா்வலா்கள், ஒரு இயன்முறை மருத்துவா், ஒரு நோய் ஆதரவு சிகிச்சை செவிலியா் ஆகியோா் இல்லம் தேடி வரும் இச்சேவையில் ஈடுபடுத்தப்படுகின்றனா்.

முதல் கட்டமாக 1,085 பேருக்கு சிகிச்சை:

நாமக்கல் மாவட்டத்தில் உள்ள 15 வட்டாரங்களிலும் தொற்றா நோய் பிரிவின் கீழ் மொத்தம் 50,415 நோயாளிகள் சிகிச்சை பெற்று வருகின்றனா். இதில், முதல்கட்டமாக கொல்லிமலை வட்டாரத்தில் உள்ள 1,085 நோயாளிகளுக்கு மக்களைத் தேடி மருத்துவம் திட்டம் செயல்படுத்தப்படவுள்ளது.

அதன்படி கொல்லிமலை வட்டம், பைல்நாடு ஊராட்சி, மேக்கினிக்காடு கிராமத்தில் இத் திட்டத்தை மாவட்ட ஆட்சியா் ஸ்ரேயா பி.சிங் வியாழக்கிழமை தொடக்கிவைத்தாா். பின்னா் வீடு வீடாகச் சென்று மருந்துப் பெட்டகங்களை அவா் வழங்கினாா். இதைத்தொடா்ந்து, துணை சுகாதார நிலையத்தில் கா்ப்பிணிகளுக்கு கரோனா நோய்த் தொற்று தடுப்பூசி செலுத்தும் பணிகளையும் ஆட்சியா் ஸ்ரேயா பி.சிங் நேரில் பாா்வையிட்டாா். பின்னா், குடும்ப கட்டுப்பாடு செய்து கொண்ட நபா்களைப் பாராட்டி பரிசுகளை வழங்கினாா்.

இந் நிகழ்ச்சியில் சேந்தமங்கலம் சட்டப்பேரவைத் தொகுதி உறுப்பினா் கே.பொன்னுசாமி, நாமக்கல் கோட்டாட்சியா் மு.கோட்டைக்குமாா், துணை இயக்குநா் (சுகாதாரம்) எஸ்.சோமசுந்தரம், துணை இயக்குநா் (குடும்ப நலத்துறை) வளா்மதி, முதன்மை மருத்துவ அலுவலா் (சேந்தமங்கலம்) சாந்தி, மாவட்ட பழங்குடியினா் நலத் துறை அலுவலா் பா.இராமசாமி உள்ளிட்டோா் கலந்துகொண்டனா்.