ராசிபுரம் அருகே செங்கல் சூளையில் கொத்தடிமைகளாக இருந்த 4 சிறுவா், சிறுமிகள் உள்பட 11 போ் செவ்வாய்க்கிழமை மீட்கப்பட்டனா்.

ராசிபுரம் அருகே உள்ள முள்ளுக்குறிச்சி, ஊனந்தாங்கல் பகுதியைச் சோ்ந்தவா் குணசேகரன். இவருக்குச் சொந்தமாக செங்கல் சூளையில் மூன்று குடும்பங்களைச் சோ்ந்த 4 சிறுவா், சிறுமிகள் உள்பட 11 போ் கடந்த 2 ஆண்டுகளாக செங்கல் அறுக்கும் பணியில் கொத்தடிமைகளாக இருந்துள்ளனா். இவா்கள் அனைவரும் கிருஷ்ணகிரியைச் சோ்ந்தவா்கள்.

இந்த நிலையில், செங்கல் சூளையில் பணியாற்றுபவா்களின் உறவுப் பெண் சரசு என்பவா் அவா்களைப் பாா்ப்பதற்காகச் சென்றாா். ஆனால், அவரை செங்கல் சூளை உரிமையாளா் அனுமதிக்கவில்லையாம். இதுகுறித்து வருவாய்த் துறையினரிடம் சரசு புகாா் தெரிவித்தாா்.

இதையடுத்து, நாமக்கல் கோட்டாட்சியா் கோட்டைகுமாா் தலைமையில் ராசிபுரம் வட்டாட்சியா் காா்த்திகேயன், சைல்டு லைன் அலுவலா்கள் அனைவரும் செங்கல் சூளைக்கு நேரில் சென்று அங்கு பணியாற்றுபவா்களிடம் விசாரணை நடத்தினா்.

கடந்த 2 ஆண்டுகளுக்கு முன் குடும்பம் ஒன்றுக்கு ரூ. ஒரு லட்சத்து 15 ஆயிரத்தை முன்பணமாகத் தந்து செங்கல் சூளைக்கு அழைத்து வந்தனா். வாங்கிய பணத்துக்கு வட்டியும் பெற்றுக் கொண்டு செங்கல் சூளை உரிமையாளா் அதிக வேலை அளித்ததாக அனைவரும் புகாா் தெரிவித்தனா். மேலும், சிறுவா்கள், சிறுமிகளை செங்கல் சூளை, தோட்ட வேலைக்குப் பயன்படுத்தியதாகவும் வருவாய்த் துறையினரிடம் அவா்கள் தெரிவித்தனா்.

இதையடுத்து, செங்கல் சூளையில் கொத்தடிமைகளாக இருந்த கோவிந்தன் (33), முருகன் (33), செல்வராஜ் (28), சந்தியா (21), பாஞ்சாலி (25), சத்தியா (28), செல்வி (28), சுப்ரியா (11), சதீஸ் (7), நாகலட்சுமி (7), லோகித் (5) ஆகிய 11 போ் மீட்கப்பட்டனா். இதுகுறித்து வருவாய்த் துறையினா் தொடா்ந்து விசாரணை நடத்தி வருகின்றனா்.