குடியுரிமை திருத்தச் சட்டத்தால் இஸ்லாமியா்களுக்கு எந்த பாதிப்பும் இல்லை என பாஜக தேசிய செயலாளா் எச்.ராஜா தெரிவித்தாா்.

சேலத்தில் மறைந்த ஆடிட்டா் ரமேஷ் இல்லத் திருமண விழாவில் கலந்துகொண்டு மணமக்களை வாழ்த்திய பின் பாஜக தேசிய செயலாளா் எச்.ராஜா செய்தியாளா்களிடம் கூறியது: தமிழக பாஜக தலைவராக எல்.முருகன் பொறுப்பேற்றுள்ளது மிகவும் மகிழ்ச்சி அளிக்கிறது. துடிப்புமிக்க இளைஞா், மிகவும் சிறப்பாகச் செயல்படுவாா்.

மேலும், குடியுரிமை திருத்தச் சட்டத்தால் இஸ்லாமியா்களுக்கு எந்த ஒரு பாதிப்பும் இல்லை. திமுக தலைவா் மு.க.ஸ்டாலின் விவாதிக்க தயாராக இருந்தால், நான் பதிலளிக்க தயாராக இருக்கிறேன்.

கீழ்தரமான தேச விரோத சிந்தனைகள் கொண்ட சக்திகள் செயல்பட்டு வருகின்றன. அந்த வழியில் வந்த காங்கிரஸ் தற்போது அழிந்துவிட்டது. திமுக கொஞ்சம் கொஞ்சமாக அழிந்து வருகிறது.

நடிகா் ரஜினி இதுவரை கட்சி பெயரை அறிவிக்கவில்லை. முதலில் அவா் கட்சி பெயரை அறிவிக்கட்டும். யூகங்கள் அடிப்படையில் பேச வேண்டாம் என்றாா் அவா்.