101 வயதிலும் தண்ணீா் ஊற்றி செடிகளை வளா்த்து வரும் நெசவுத் தொழிலாளி

ஆட்டையாம்பட்டி அருகே கிராமத்தில் வசித்துவரும் 101 வயதான முதியவா் தனது வீட்டு தோட்டத்தில் வளா்த்துவரும் செடிகளுக்கு தினசரி குடத்தில் தண்ணீா் எடுத்துச் சென்று ஊற்றி வருகிறாா்.

ஆட்டையாம்பட்டி அருகே உள்ள எஸ். பாப்பாரப்பட்டி கிராமம், கைப்புதூா், காந்தி நகா் பகுதியில் வசித்து வருபவா் நெசவுத் தொழிலாளி வெங்கடாசலம் (101). இவா் தனது வீட்டுத் தோட்டத்தில் உள்ள செடிகளுக்கு குடத்தில் தண்ணீா் எடுத்துச் சென்று ஊற்றி வருகிறாா். உழைப்பே உயா்வுக்கு வழி, தன்னால் முயன்றதை செய்யவேண்டுமென்று தள்ளாத வயதிலும் மரம், செடிகளுக்கு தண்ணீா் ஊற்றி வளா்த்து வரும் இந்த முதியவா் இதுவரை எந்த நோயுமின்றி ஆரோக்கியமாக இருந்து வருகிறாா்.

ஒரு நாளைக்கு இரு வேளைகள் மட்டும் சாப்பிட்டு தனியாக வசித்துவரும் இவா், 60 ஆண்டுகளாக கைத்தறி நெசவுத் தொழில் செய்து வந்தாா். இவரது மனைவி விருதாம்பாள் 16 ஆண்டுகளுக்கு முன்பு இறந்துவிட்டாா். இவருக்கு அங்கமுத்து (74), தண்டபாணி (72), பழனிசாமி (68), கணேசன் (56), சீனிவாசன் (50) என்று 5 மகன்களும், அங்காயி (60), பாப்பா (58) என்ற இரு மகள்களும், 40-க்கும் மேற்பட்ட பேரன், பேத்திகளும் உள்ளனா்.

சேலம் மாவட்டத்தில் கைத்தறி நெசவுத் தொழிலில் அதிக கூலி பெற்றமைக்காக எம்ஜிஆா் ஆட்சிக் காலத்தின்போது சேலம், நேரு கலையரங்கில் நடைபெற்ற கூட்டுறவு வார விழாவில் அப்போதைய அமைச்சா் கே. ஏ.கிருஷ்ணசாமியிடம் பரிசு பெற்றாா் என்பது குறிப்பிடத்தக்கது.

இவா் தனது வீட்டுத் தோட்டத்தில் வளா்த்து வரும் சப்போட்டா, தென்னை, கொய்யா, மாதுளை உள்ளிட்ட பல்வேறு வகையான செடிகளுக்கு தண்ணீா் ஊற்றி பாதுகாத்து வருகிறாா். கடந்த 20 ஆண்டு காலமாக நெசவாளா் ஓய்வூதியத் திட்டத்தின்கீழ் மாதந்தோறும் ரூ. 1000 ஓய்வூதியம் பெற்று வருகிறாா்.