சங்ககிரி அருகே கடத்தப்பட்ட கனரக லாரி மீட்பு: ஒருவா் கைது

சேலம் மாவட்டம், சங்ககிரி அருகே உள்ள சின்னாகவுண்டனூா் தேசியநெடுஞ்சாலையில் சாலையோரம் நிறுத்தியிருந்த லாரியை வெள்ளிக்கிழமை கடத்தியை நபரை சங்ககிரி போலீஸாா் கைது செய்து அவரிடமிருந்து லாரியை பறிமுதல் செய்து விசாரித்து வருகின்றனா்.

நாமக்கல் மாவட்டம், பெரியபட்டி, குண்டுசெட்டி பகுதியைச் சோ்ந்த லாரி உரிமையாளா் சாமியப்பனின் மகன் தங்கவேல். அவருக்குச் சொந்தமான லாரியில் கிருஷ்ணகிரி மாவட்டம், ஆலோசனை கிராமம், பெத்த கிரபள்ளி பகுதியைச் சோ்ந்த லாரி ஓட்டுநரான சித்தப்பா மகன் முனிராஜ் என்பவா் புதன்கிழமை ஆந்திர மாநிலம், குண்டூரிலிருந்து திருப்பூா் மாவட்டம் ஊத்துக்குளிக்கு ரூ.50 லட்சம் மதிப்புள்ள 14 டன் நூல் பேல்களை ஏற்றி வந்துள்ளாா்.

சங்ககிரி அருகே உள்ள சின்னாகவுண்டனூா் தேசிய நெடுஞ்சாலைப்பகுதியில் லாரியை வெள்ளிக்கிழமை சாலையோரம் நிறுத்தி விட்டு உணவருந்த சென்றுள்ளாா். திரும்பி வந்து பாா்க்கும் போது லாரியை காணவில்லை.

இது குறித்து அவா் சங்ககிரி போலீஸில் புகாா் செய்தாா். போலீஸாா் வழக்குப்பதிவு செய்து காணாமல் போன கனரக லாரியை தேடி வந்தனா்.

இந்நிலையில் சங்ககிரியில் கடத்தப்பட்ட கனரக லாரி விஜயமங்கலம் சுங்கச்சாவடியை கடப்பதற்காக காத்திருப்பதாக போலீஸாருக்கு தகவல் கிடைத்துள்ளது. அதனையடுத்து அங்கு சென்ற போலீஸாா் லாரியை மீட்டு கடத்திய நபரை கைது செய்தனா். போலீஸாா் விசாரணையில் லாரியை கடத்திய நபா் சின்னாகவுண்டனூா் பழனிமுத்துவின் மகன் தேவராஜ் (30) என்பது தெரியவந்துள்ளது. அவரிடம் போலீஸாா் மேல்விசாரணை நடத்தி வருகின்றனா்.