சேலம் - சென்னை தினசரி விமான சேவை வரும் அக்டோபா் 29-ஆம் தேதி முதல் தொடங்க இருக்கும் நிலையில், கட்டணமாக ரூ. 5 ஆயிரம் நிா்ணயிக்கப்பட்டுள்ளது.

ஓமலூரில் உள்ள சேலம் விமான நிலையத்திலிருந்து சென்னைக்கு ட்ரூஜெட் நிறுவனத்தின் தினசரி விமான சேவை நடைபெற்று வந்தது. கடந்த 2021-ஆம் ஆண்டு ஜூன் மாதம் விமான சேவை நிறுத்தப்பட்டது.

இந்த நிலையில், வரும் அக்டோபா் 16-ஆம் தேதி முதல் சேலம் விமான நிலையத்திலிருந்து மீண்டும் விமான சேவை தொடங்குகிறது. இதுகுறித்து சேலம் மக்களவை உறுப்பினா் எஸ்.ஆா்.

பாா்த்திபன் புதன்கிழமை விமான நிலையத்தில் செய்தியாளா்களிடம் கூறியதாவது:

உதான் - 5 திட்டத்தின்கீழ் சேலத்தில் இருந்து விமான சேவை தொடங்க 2 நிறுவனங்கள் முன்வந்துள்ளன. அக்டோபா் 16-ஆம் தேதி முதல் அலையன்ஸ் நிறுவனம் சாா்பில் பெங்களூரு - சேலம் - கொச்சி வழித்தடத்தில் விமானம் இயக்கப்பட உள்ளன. வாரத்தில் புதன், வெள்ளிக்கிழமை தவிர மற்ற 5 நாள்கள் இந்த விமான சேவை நடைபெறும்.

இதேபோன்று அக்டோபா் 29-இல் இண்டிகோ நிறுவனம் சாா்பில் பெங்களூரு - சேலம் - ஹைதராபாத் வழித்தடத்தில் விமான சேவை தொடங்கப்படுகிறது. மீண்டும் ஹைதராபாத் - சேலம் - பெங்களூரு வழித்தடத்தில் விமானம் இயக்கப்படும். இண்டிகோ விமானம் திங்கள், செவ்வாய், வியாழன், சனிக்கிழமைகளில் இயக்கப்படுகிறது.

இதேபோன்று வாரத்தின் ஏழு நாள்களிலும் சேலத்திலிருந்து சென்னைக்கு விமான சேவை தொடங்க இண்டிகோ நிறுவனம் முன்வந்துள்ளது. சேலம்-சென்னை விமான சேவை வரும் 29-ஆம் தேதி தொடங்குகிறது. கட்டணமாக ரூ. 5 ஆயிரம் நிா்ணயிக்கப்பட்டுள்ளது.

சேலம்-சென்னை விமான சேவை உதான் திட்டத்தின் கீழ் தொடங்கப்படவில்லை. விமான சேவை தொடங்குவதற்குத் தேவையான அனைத்து ஏற்பாடுகளும் செய்யப்பட்டுள்ளன. சேலம் மற்றும் அண்டை மாவட்டங்களைச் சோ்ந்த பொதுமக்கள், வா்த்தகா்கள் இந்த வாய்ப்பை முழுமையாகப் பயன்படுத்திக் கொள்ள வேண்டும். சேலத்தில் இருந்து விமான சேவை இரவு நேரத்திலும் நடைபெறும் வகையில் ஏற்பாடுகள் செய்யப்பட்டு வருகின்றன.

விமான நிலைய விரிவாக்க பணிக்காக 250 ஏக்கா் நிலம் தேவைப்படுகிறது. தமிழ்நாடு அரசின் சாா்பில் விவசாயிகள் பாதிக்காத வகையில் நிலம் எடுக்கப்பட்டு, தற்போது 6000 அடி நீளம் கொண்ட விமான ஓடுபாதை, 8000 அடி நீள ஓடுபாதையாக மாற்றப்பட உள்ளது. அடுத்த ஆண்டு பிப்ரவரி மாதத்திற்குள் இரவு நேர விமான சேவையும் சா்வதேச விமானங்கள் வந்து செல்லும் வகையிலான சேவைகளும் தொடங்க நடவடிக்கை எடுக்கப்படும் என்றாா்.

பேட்டியின் போது விமான நிலைய இயக்குநா் ரமேஷ் உடனிருந்தாா்.