சேலம் வழியாக மதுரை- பெங்களூரு இடையே வந்தே பாரத் ரயில் சேவை தொடங்கப்பட்டுள்ளது.

பிரதமா் நரேந்திர மோடி காணொலி வாயிலாக ரயில் சேவையை தொடங்கிவைத்தாா். இதையொட்டி சேலம் ரயில்வே கோட்டம் சாா்பில் சனிக்கிழமை நடைபெற்ற நிகழ்ச்சியில் மக்களவை உறுப்பினா் டி.எம்.செல்வகணபதி, சேலம் மேற்கு சட்டப் பேரவை உறுப்பினா் இரா.அருள், ரயில்வே கோட்ட மேலாளா் பங்கஜ்குமாா் சின்ஹா, மாவட்ட வருவாய் அலுவலா் மரு.மேனகா உள்ளிட்டோா் கலந்து கொண்டனா்.

மதுரையில் இருந்து புறப்பட்டு சேலத்துக்கு மாலை 5.5 மணிக்கு வந்த வந்தே பாரத் ரயிலுக்கு பாஜகவினா் உற்சாக வரவேற்பு அளித்தனா்.

மதுரை- பெங்களூரு கண்டோன்மென்ட் இடையே வாரத்தில் செவ்வாய்க்கிழமை தவிர 6 நாள்கள் இயக்கப்படும் இந்த ரயில் மதுரையில் இருந்து அதிகாலை 5.15 மணிக்குப் புறப்பட்டு திண்டுக்கல், திருச்சி, கரூா், நாமக்கல் வழியாக சேலத்தை காலை 9.15 மணிக்கு வந்தடையும். அங்கிருந்து 9.20க்கு புறப்பட்டு, கிருஷ்ணராஜபுரம் வழியாக பிற்பகல் 1 மணிக்கு பெங்களூரு கண்டோன்மென்ட்டை சென்றடையும்.

மறு மாா்க்கத்தில், இந்த ரயில் பெங்களூரு கண்டோன்மென்ட்டில் இருந்து மதியம் 1.30 மணிக்குப் புறப்பட்டு, கிருஷ்ணராஜபுரம் வழியாக சேலத்துக்கு மாலை 4.50 மணிக்கும், நாமக்கல்லுக்கு மாலை 5.38 மணிக்கும், கரூருக்கு 5.58 மணிக்கும் வந்து செல்லும். தொடா்ந்து திருச்சி, திண்டுக்கல் வழியாக இரவு 9.45 மணிக்கு மதுரையை சென்றடையும்.

இந்த ரயில் மதுரை, திண்டுக்கல், திருச்சி, கரூா், நாமக்கல், சேலம், கிருஷ்ணராஜபுரம் ஆகிய நிலையங்களில் நின்று செல்லும். இந்த ரயிலில் 8 பெட்டிகள் இணைக்கப்பட்டுள்ளன.

சேலம் ரயில் நிலையத்திலிருந்து சனிக்கிழமை பெங்களூரு நோக்கி பயணித்த ரயிலை பாஜக மாநில துணை தலைவா் கே.பி. ராமலிங்கம், பாஜக சுற்றுச்சூழல் பிரிவு தலைவா் கோபிநாத், கோட்ட மேலாளா் பங்கஜ்குமாா் சின்ஹா உள்ளிட்டோா் கொடியசைத்து வழியனுப்பி வைத்தனா்.