தீவட்டிப்பட்டியில் சுவரில் துளையிட்டு நகைக் கடையில் திருட்டு

ஓமலூா்: தீவட்டிப்பட்டி பழைய காவல் நிலையம் எதிரே நகைக் கடையின் சுவரில் துளையிட்டு 30 கிராம் தங்கம், ஆறு கிலோ வெள்ளியை திருடிச் சென்றவா்களை போலீஸாா் தேடி வருகின்றனா்.

சேலம் - பெங்களூரு தேசிய நெடுஞ்சாலையில் ஓமலூா் அருகே உள்ள தீவட்டிப்பட்டி பேருந்து நிறுத்தப் பகுதியில் நடுப்பட்டி ஊராட்சி, எலத்தூா் பகுதியைச் சோ்ந்த காா்த்திக் என்பவா் நகைக்கடை வைத்துள்ளாா். தீவட்டிப்பட்டி பழைய காவல் நிலையம், போலீஸாா் குடியிருப்புக்கு எதிரே அமைந்துள்ள இவரது கடையில், அதிக அளவிலான கால் கொலுசு, அரைஞாண் கொடி, பிரேஸ்லெட், காப்பு உள்ளிட்ட வெள்ளிப் பொருள்களும், தோடு, மூக்குத்தி உள்ளிட்ட சிறு தங்க நகைகளும் வியாபாரம் செய்யப்பட்டு வந்துள்ளன.

இந்நிலையில், வழக்கம் போல திங்கள்கிழமை காலை கடைக்கு வந்த காா்த்தி கடையைத் திறந்து பாா்த்த போது, கடைக்குள் இருந்த தங்க நகைகள், வெள்ளிப் பொருள்கள் அனைத்தும் மாயமாகி இருந்ததைக் கண்டு அதிா்ச்சி அடைந்தாா். உள்ளே சென்று பாா்த்த போது, கடையின் பின்புறச் சுவரை துளையிட்டு உள்ளே வந்த மா்ம நபா்கள் அங்கிருந்த நகை, வெள்ளிப் பொருள்கள், சிசிடிவி கேமரா ஹாா்ட் டிஸ்க் உள்ளிட்ட அனைத்தையும் திருடிச் சென்றது தெரியவந்தது. இதில் 6 கிலோ வெள்ளிப் பொருள்கள், 30 கிராம் தங்க நகைகள் திருடு போனது தெரியவந்தது.

தகவலின் பேரில் சம்பவ இடத்துக்கு வந்த ஓமலூா் டிஎஸ்பி சஞ்சீவ்குமாா் விசாரணை நடத்தி வருகிறாா்.