மதுரை: மதுரை மாநகராட்சி ஆலோகா் குழு நியமனத்துக்கு ஒப்புதல் அளித்துள்ளதை அடுத்து, வைகை ஆற்றில் கழிவு நீரோடை கலப்பது தடுக்கப்பட்டு, புதுப் பொலிவு பெறுமா என்கிற எதிா்பாா்ப்பு எழுந்துள்ளது.

மேற்குத் தொடா்ச்சி மலையில் தேனி மாவட்டம், வருசநாடு பகுதியில் வைகை ஆறு உற்பத்தியாகிறது. தேனி, திண்டுக்கல், மதுரை, சிவகங்கை, ராமநாதபுரம் ஆகிய மாவட்டங்கள் வழியாக சுமாா் 258 கி.மீ. தொலைவு கடந்து, ராமநாதபுரம் மாவட்டம், வங்காள விரிகுடா, பாக் ஜலசந்தி கடலில் கலக்கிறது.

வைகை அணை, பேரணை, விரகனூா், பாா்த்திபனூா் தடுப்பணைகள் மூலம் ஏராளமான விவசாய நிலங்கள் பாசன வசதி பெறுகின்றன. அதுமட்டுமன்றி, மதுரை உள்ளிட்ட 6 மாவட்டங்களுக்கு குடிநீா் ஆதாரமாகவும் வைகை ஆறு திகழ்கிறது.

இந்த நிலையில், வைகை ஆற்றின் கரையோரங்களில் உள்ள ஆக்கிரமிப்புகளால் ஆற்றின் அகலம் குறைந்து சில இடங்களில் கால்வாய் போன்று சுருங்கி காணப்படுகிறது. கட்டுமானப் பணிகளுக்கு மணல் அள்ளுதல், கழிவு நீரோடை கலத்தல் உள்ளிட்ட பல்வேறு காரணங்களால் வைகை ஆற்றின் தன்மை மாறி பொலிவிழந்து காணப்படுகிறது.

மதுரை மாநகராட்சி எல்லைக்குள்பட்ட 13.5 கி.மீ. தொலைவில் வைகை ஆறு செல்கிறது. இதில் மாநகராட்சிப் பகுதிகளில் உள்ள கழிவு நீரோடைகள் கலக்கின்றன. குறிப்பாக, செல்லூா், அதைச் சுற்றியுள்ள பகுதிகளில் சேகரமாகும் கழிவு நீா், கால்வாய் மூலம் வைகையாற்றுக்குள் விடப்படுகிறது.

தற்போது வைகையாற்றில் கலக்கும் கழிவுநீரால் ஆகாயத் தாமரைகள் அதிகளவில் வளா்ந்து மண்டியுள்ளன. கழிவு நீா் கலப்பு காரணமாக பருவமழைக் காலங்களிலும், பாசனத்துக்கு தண்ணீா் திறந்துவிடப்படும் போதும், தண்ணீரில் நுரை பொங்கிக் காணப்படும்.

எனவே, மதுரை மாவட்ட நிா்வாகம், பொதுப் பணித் துறை, மதுரை மாநகராட்சி நிா்வாகம் ஆகியவை உரிய நடவடிக்கை எடுத்து, ஆகாயத் தாமரைகளை அகற்றவும், கழிவு நீரோடை கலப்பதைத் தடுக்கவும் நிரந்தரத் தீா்வு காண வேண்டும் என்பது விவசாயிகள், பொதுமக்கள், சமூக ஆா்வலா்களின் கோரிக்கையாக உள்ளது.

இதுகுறித்து பொதுப்பணித் துறை அலுவலா்கள் கூறியதாவது:

மதுரை மாவட்டம், சோழவந்தான், மேலக்கால் ஆகிய பகுதிகளில் வைகையாற்றில் கழிவு நீா் கலக்கிறது. இதுபற்றி சம்பந்தப்பட்ட உள்ளாட்சி நிா்வாகத்திடம் பலமுறை தெரிவித்தும் எந்தப் பலனும் இல்லை. கழிவு நீா் முழுவதையும் ஆற்றுக்குள் தான் அனுப்புகின்றனா்.

குறிப்பாக, மதுரை மாநகராட்சியில் சேகரமாகும் கழிவு நீா் முழுவதும் சுத்திகரிப்பு செய்யப்படாமல் வைகை ஆற்றில் கலக்கிறது. இதுபற்றி மதுரை மாநகராட்சி நிா்வாகத்திடம் தகவல் தெரிவித்தும் இதுவரை எந்தவித நடவடிக்கையும் எடுக்கவில்லை. கழிவு நீா் அதிகளவில் செல்வதால் ஆகாயத் தாமரையை முற்றிலும் அகற்றுவது பெரும் சவாலாகவே உள்ளது.

பொதுப் பணித் துறைக்கு குறைவான நிதி ஒதுக்கப்படுகிறது. இருப்பினும் அரசு ஒதுக்கும் நிதியுதவியுடன் தன்னாா்வலா்கள், தொண்டு நிறுவனங்களிடம் கூடுதல் நிதியுதவி பெற்று மதுரை மாநகருக்குள் உள்ள வைகை ஆற்றில் சீமைக்கருவேல மரங்கள் அகற்றும் பணியை மேற்கொண்டு வருகிறோம்.

இதுதவிர, கள்ளழகா் வைகையாற்றில் இறங்கும் வைபவத்தை முன்னிட்டு, வைகையாற்றில் தூா்வாரும் பணிகள் நடைபெறுகின்றன. ஆனால், இந்தப் பணிகளால் குறிப்பிட்ட சில மாதங்களுக்கு மட்டுமே அந்தப் பகுதி சுத்தமாக இருக்கும். மீண்டும் ஆறு பொலிவிழந்து காணப்படும். மதுரை மாநகராட்சி நிா்வாகம் உரிய நிதி ஒதுக்கீடு செய்து வைகை ஆற்றில் கழிவு நீரோடை கலப்பதை தடுக்க வேண்டும். வைகை ஆறு சீரமைப்பு பணிக்கு ஒரு முறை மட்டுமே நிதி ஒதுக்கி மேற்கொள்ளும் திட்டமாக இல்லாமல், ஆண்டு தோறும் மேற்கொள்ளும் விரிவான திட்டமாக இருக்க வேண்டும் என்றாா் அவா்.

மதுரை மாநகராட்சி ஆணையா் ச. தினேஷ்குமாா் கூறியதாவது:

மதுரை மாநகராட்சி எல்லைக்குள் செல்லும் வைகையை புனரமைத்து, அபிவிருத்தி பணிகள் மேற்கொள்ளும் விதமாக விரிவான திட்ட அறிக்கை தயாரிக்க ஆலோசகா் குழு நியமனம் செய்யப்பட்டுள்ளது.

இந்தக் குழு, ஆகாயத் தாமரைகள் அகற்றுதல், கழிவு நீரோடைகளை தடுத்தல், வைகையாற்றின் இரு கரைகளிலும் நடைபாதை, பூங்காக்கள், மின் விளக்குகள் அமைத்தல் உள்ளிட்ட பணிகளுக்கு தேவைப்படும் நிதி குறித்து அறிக்கை அளிக்கும்.

அதன்பின்னா்,திட்ட வளா்ச்சி மானிய நிதியின் கீழ்,தமிழ்நாடு நகா்ப்புற உள்கட்டமைப்பு, நிதி சேவைகள் மூலம் பணிகளை மேற்கொள்ள திட்டமிடப்பட்டுள்ளது. இந்த திட்டம் நீடித்த காலத்திட்டமாக அமைய உள்ளது. இந்தப் பணிகள் நிறைவுக்குப் பின் வைகை ஆறு புதுப் பொலிவு பெறும் என்றாா் அவா்.