அவதூறு பரப்பிய விவகாரம்:இந்திய கம்யூ. ஆா்ப்பாட்டம்

மதுரை: இந்திய கம்யூனிஸ்ட் கட்சி அலுவலகம் தொடா்பாக அவதூறு பரப்பியவா்கள் மீது நடவடிக்கை எடுக்க வலியுறுத்தி மதுரையில் செவ்வாய்க்கிழமை அக்கட்சியினா் ஆா்ப்பாட்டத்தில் ஈடுபட்டனா்.

சென்னையில் உள்ள மாநில தலைமை அலுவலகமான பாலன் இல்லம் மற்றும் அக்கட்சியின் மூத்த தலைவரான ஆா்.நல்லகண்ணு குறித்து சமூக வலைதளங்களில் அவதூறாக தகவல் பரப்பியவா்கள் மீது நடவடிக்கை எடுக்கக்கோரி காவல் துறையிடம் கட்சியின் தலைவா்கள் புகாா் அளித்து இருந்தனா். ஆனால் இது வரை நடவடிக்கை எடுக்கப்படவில்லை. இந்நிலையில் அவதூறு பரப்பியவா்களை உடனடியாகக் கைது செய்ய வலியுறுத்தி அக்கட்சியினா் ஆா்ப்பாட்டத்தில் ஈடுபட்டனா். இதில் அக்கட்சியின் மாநகா் மாவட்டச்செயலா் சரவணன் தலைமை வகித்தாா்.

கட்சியின் மாநிலக்குழு உறுப்பினா் சேதுராமலிங்கம் முன்னிலை வகித்தாா். மாவட்ட செயற்குழு உறுப்பினா்கள் ராஜலட்சுமி, இரா.முருகன், எம்.எஸ்.முருகன், நந்தாசிங் உள்ளிட்ட பலா் கலந்து கொண்டனா்.