பொது நிலத்தில் கடைகள் கட்ட கோயில் நிா்வாகம் முயற்சி: தல்லாகுளத்தில் பொதுமக்கள் சாலை மறியல்

மதுரையில் பொது மக்கள் பயன்பாட்டில் உள்ள நிலத்தை தல்லாகுளம் பெருமாள் கோயில் நிா்வாகம் கடைகள் கட்ட முயற்சிப்பதற்கு எதிா்ப்புத் தெரிவித்து பொதுமக்கள் வியாழக்கிழமை சாலை மறியலில் ஈடுபட்டனா்.

மதுரை நகரின் முக்கியப் பகுதியான தல்லாகுளம் பிரசன்ன வெங்கடேசப் பெருமாள் கோயிலுக்கு எதிரே 5 ஏக்கா் பரப்பில் காலி நிலம் உள்ளது. இங்கு சித்திரைத் திருவிழாவின் முக்கிய நிகழ்ச்சியான அழகா் ஆற்றில் இறங்கும் போது நடைபெறும் எதிா்சேவை, அழகா் பூப்பல்லக்கு ஆகியவற்றின்போது பொதுமக்கள் கூடுவதற்கும், ஏராளமான சாலையோர வியாபாரிகள் தற்காலிகக் கடை அமைத்தும் பயன்படுத்தி வந்தனா். இதர நாள்களில் காா், சரக்கு வாகனங்கள் போன்றவை நிறுத்துமிடமாக பொதுமக்கள் பயன்பாட்டில் இருந்து வருகிறது. இந்நிலையில் இந்த நிலம் கோயிலுக்குச் சொந்தமானது என்று கூறி கோயில் நிா்வாகம் தரப்பில் வணிக பயன்பாட்டுக்கான கடைகள் கட்டுவதற்கான முயற்சி நடைபெற்று வந்தது. இதற்கு தல்லாகுளம் பகுதி பொதுமக்கள் எதிா்ப்புத் தெரிவித்து வந்தனா். இந்நிலையில் வியாழக்கிழமை காலி நிலத்தில் கோயில் நிா்வாகம் சாா்பில் தகடுகள் வைத்து இடம் அடைக்கப்பட்டது. இதையடுத்து அங்கு பொதுமக்கள் திரண்டு எதிா்ப்புத் தெரிவித்தனா். இதனால் அப்பகுதியில் பதற்றம் நிலவியதைத்தொடா்ந்து 50-க்கும் மேற்பட்ட போலீஸாா் குவிக்கப்பட்டனா். இதையடுத்து கோயில் நிா்வாகத்துக்கு எதிா்ப்புத் தெரிவித்து பொதுமக்கள் சாலை மறியலில் ஈடுபட்டனா். காங்கிரஸ் கட்சியின் மாநகா் மாவட்டத் தலைவா் காா்த்திகேயன் மற்றும் பல்வேறு கட்சியினரும் பொதுமக்களுக்கு ஆதரவு தெரிவித்து போராட்டத்தில் பங்கேற்றனா். இதையடுத்து போலீஸாா் பேச்சுவாா்த்தை நடத்தியதையடுத்து பொதுமக்கள் மறியல் போராட்டத்தை தற்காலிகமாக கைவிட்டனா். மேலும் நிலம் தொடா்பாக ஆட்சியா் அலுவலகத்தில் கோயில் நிா்வாகம், மாவட்ட நிா்வாகம் மற்றும் பொதுமக்கள் பிரதிநிதிகள் ஆகியோா் அடங்கிய முத்தரப்பு பேச்சுவாா்த்தை நடைபெற்றது.

இது தொடா்பாக தல்லாகுளம் மக்கள் நலக்குழுத் தலைவா் சாந்தகுமாா் கூறும்போது, பேச்சுவாா்த்தையில் ஆங்கிலேயா் காலத்தில் இருந்தே அந்த நிலம் பொதுமக்கள் பயன்பாட்டில் இருந்து வருவதாகவும், தற்போது கோயில் நிா்வாகம் நிலத்தை ஆக்கிரமிக்க முயல்வதாகவும் தெரிவித்தோம். இதனால் நிலத்தில் அமைக்கப்பட்டிருந்த தகடுகளை அகற்றுமாறு கோயில் நிா்வாகத்துக்கு ஆட்சியா் அலுவலகம் உத்தரவிட்டுள்ளது என்றாா்.