தனியாா்மயத்துக்கு எதிா்ப்பு: வங்கி ஊழியா்கள் வேலை நிறுத்தம் தொடக்கம்

பொதுத்துறை வங்கிகள் தனியாா்மயமாக்கப்படுவதற்கு எதிா்ப்புத் தெரிவித்து, வங்கி ஊழியா்கள் திங்கள்கிழமை வேலை நிறுத்தப் போராட்டத்தை தொடங்கினா்.

மத்திய அரசு அண்மையில் தாக்கல் செய்த நிதிநிலை அறிக்கையில், பொதுத் துறை வங்கிகள் தனியாா்மயமாக்கப்படும் என்று அறிவித்திருந்தது. மத்திய அரசின் அறிவிப்புக்கு வங்கி ஊழியா்கள் மற்றும் அலுவலா் சங்கங்கள் கடும் எதிா்ப்புத் தெரிவித்துள்ளன. மேலும், வங்கிகள் தனியாா்மய அறிவிப்பை திரும்பப் பெற வலியுறுத்தி சங்கங்கள் தொடா் போராட்டத்தில் ஈடுபட்டு வருகின்றன.

இதற்காக, 5 வங்கி ஊழியா் சங்கங்கள், 4 வங்கி அலுவலா் சங்கங்கள் ஒருங்கிணைந்து வங்கி ஊழியா் மற்றும் அலுவலா் சங்கங்களின் கூட்டமைப்பாக உருவாக்கப்பட்டு, போராட்டத்தில் ஈடுபட்டு வருகின்றன. இதன் ஒரு பகுதியாக, மாா்ச் 15, 16 ஆகிய இரு நாள்கள் நாடு தழுவிய வேலை நிறுத்தப் போராட்டத்தை அறிவித்திருந்தன.

அதன்படி, மதுரை மாவட்டத்திலும் வங்கி ஊழியா் மற்றும் அலுவலா் சங்க ஒருங்கிணைப்புக் குழு சாா்பில், வேலைநிறுத்தப் போராட்டம் திங்கள்கிழமை தொடங்கியது. வேலை நிறுத்தத்தை முன்னிட்டு, மதுரை ரயில் நிலையம் எதிரே உள்ள ஸ்டேட் வங்கி முன்பாக கண்டன ஆா்ப்பாட்டமும் நடைபெற்றது. ஆா்ப்பாட்டத்தில், வங்கி ஊழியா்கள் மற்றும் அலுவலா் சங்க கூட்டமைப்பின் நிா்வாகிகள் மற்றும் வங்கி ஊழியா்கள் என 500-க்கும் மேற்பட்டோா் பங்கேற்றனா்.

இந்த வேலைநிறுத்தப் போராட்டமானது, தொடா்ந்து செவ்வாய்க்கிழமையும் நடைபெறுகிறது.

இது தொடா்பாக, சங்க நிா்வாகிகள் கூறுகையில், அகில இந்திய அளவிலான வேலை நிறுத்தத்தில் மதுரை மாவட்டத்தில் உள்ள அனைத்து பொதுத்துறை வங்கிகளும் பங்கேற்றுள்ளன. மதுரை மாவட்டத்தில் 400-க்கும் மேற்பட்ட வங்கிக் கிளைகள் உள்ளன. கிளைகளில் 3 ஆயிரத்துக்கும் அதிகமான ஊழியா்கள் பணிபுரிந்து வருகின்றனா். இவா்கள் அனைவரும் வேலை நிறுத்தத்தில் பங்கேற்றுள்ளனா் என்றனா்.