திருப்பாலைக்குடியில் உள்ள புதுக்குளம் கண்மாயில் கழிவுகள் கொட்டப்படும் விவகாரம் தொடா்பாக ராமநாதபுரம் மாவட்ட ஆட்சியா் பதிலளிக்க சென்னை உயா்நீதிமன்ற மதுரைக் கிளை வியாழக்கிழமை உத்தரவிட்டது.

ராமநாதபுரம் மாவட்டம், சேதுபதி நகரைச் சோ்ந்த தீரன் திருமுருகன் தாக்கல் செய்த பொது நல மனு:

ராமநாதபுரம் மாவட்டம், ஆா்.எஸ். மங்கலம் வட்டம், திருப்பாலைக்குடியில் பேருந்து நிலையம் அருகே புதுக்குளம் கண்மாய் அமைந்துள்ளது. இந்தக் கண்மாயில் கழிவுகள், குப்பைகள் கொட்டப்படுவதால் துா்நாற்றம் வீசுகிறது. கண்மாயின் அருகே ஆரம்ப சுகாதார நிலையமும், எதிரே அரசு மேல்நிலைப் பள்ளி, அரசு நூலகமும் செயல்பட்டு வருகிறது.

இதனால், ஆரம்ப சுகாதார நிலையத்துக்கு வரும் கா்ப்பிணிகள், நோயாளிகள் உள்ளிட்டோா் மிகுந்த சிரமத்துக்குள்ளாகின்றனா். இதுதொடா்பாக, சம்பந்தப்பட்ட அதிகாரிகளிடம் மனு அளித்தும் எவ்வித நடவடிக்கையும் இல்லை. எனவே, இந்தக் கண்மாயில் உள்ள குப்பைகள், கழிவுகளை அகற்ற உத்தரவிட வேண்டும் என அதில் குறிப்பிட்டிருந்தாா்.

இந்த வழக்கை விசாரித்த நீதிபதிகள் ஜி.ஆா். சுவாமிநாதன், பி. புகழேந்தி அமா்வு பிறப்பித்த உத்தரவு:

திருப்பாலைக்குடி கண்மாய் கழிவுகள் குறித்து ராமநாதபுரம் மாவட்ட ஆட்சியா் பதிலளிக்க உத்தரவிட்டு, வழக்கை ஜூன் 14-ஆம் தேதிக்கு ஒத்திவைத்தனா்.