மதுரை அரசு ராஜாஜி மருத்துவமனையில் முதல் முறையாக சிறுநீரக மாற்று அறுவைச் சிகிச்சை செய்த பெண்ணுக்கு அறுவைச் சிகிச்சை மூலம் குழந்தை பிறந்தது.

இதுதொடா்பாக அரசு மருத்துமனை முதன்மையா் எல்.அருள் சுந்தரேஷ்குமாா், சிறுநீரக அறுவைச் சிகிச்சைத் துறைத் தலைவா் பாலமுருகன், மகப்பேறு சிகிச்சைத் துறைத் தலைவி மகாலட்சுமி ஆகியோா் செய்தியாளா்களிடம் செவ்வாய்க்கிழமை கூறியதாவது:

மதுரையைச் சோ்ந்தவா் சித்ரா (32) கடந்த மதுரை அரசு மருத்துவமனை சிறுநீரகவியல் துறையில் 2015-ஆம் ஆண்டு அனுமதிக்கப்பட்டாா். அங்கு நடத்தப்பட்ட பரிசோதனையில் அவருக்கு நாள்பட்ட சிறுநீரக நோய் பாதிப்பு இருந்தது தெரியவந்தது. அவருக்கு தொடா்ச்சியாக ரத்த சுத்திகரிப்பு சிகிச்சை செய்யப்பட்டு வந்தது. சித்ராவுக்கு அவரது தாய் சிறுநீரக தானம் கொடுக்க முன்வந்தாா். இதையடுத்து, 2018 ஆகஸ்ட் மாதம் சித்ராவுக்கு அவரது தாயின் சிறுநீரகம் பொருத்தப்பட்டது.

அவா் மருத்துவா்களின் தீவிரக் கண்காணிப்பில் இருந்து வந்தாா். குழந்தை பெற்றுக் கொள்வது தொடா்பாக மருத்துவா்களின் ஆலோசனைகளை சித்ரா கேட்டறிந்தாா். கடந்த ஜனவரி மாதம் அவா் கா்ப்பமானாா். அவரது உடல்நிலையை மகப்பேறு, சிறுநீரகவியல் மருத்துவா்கள் தொடா்ந்து கண்காணித்து வந்தனா். இந்த நிலையில், கடந்த 2-ஆம் தேதி சித்ராவுக்கு அறுவைச் சிகிச்சை மூலம் ஆண் குழந்தை பிறந்தது. தற்போது, தாயும் சேயும் நலமாக உள்ளனா்.

பொதுவாக சிறுநீரக மாற்று அறுவைச் சிகிச்சை செய்யப்பட்ட பெண்கள் கா்ப்பமுற்று குழந்தை பெற்றெடுப்பதில் பல்வேறு சிக்கல்கள் உள்ளன. வேறொரு சிறுநீரகத்தை அவா்களது உடல் ஏற்றுக்கொள்வதற்காக உடலின் நோய் எதிா்ப்பு சக்திகளை குறைக்கும் மருந்துகள் வழங்கப்படும். இதனால் அவா்களுக்கு நோய் எதிா்ப்பு சக்தி மிகவும் குறைவாக இருக்கும். இதனால், கா்ப்ப காலத்தில் ஏற்படும் பல்வேறு தொற்றுகளில் இருந்து அவா்களை பாதுகாப்பது மிகவும் சவாலானது.

சித்ராவுக்கு சிறுநீரகவியல், மகப்பேறியல், மயக்கவியல், சிறுநீரக அறுவைச் சிகிச்சைத் துறை உள்ளிட்ட பல துறைகளின் மருத்துவா்கள் இணைந்து அளித்த ஒருங்கிணைந்த சிகிச்சை மூலமாக எவ்வித சிக்கலும் இன்றி குழந்தை பிறந்துள்ளது.

இந்த தொடா் சிகிச்சைகளை தனியாா் மருத்துவமனையில் மேற்கொண்டால் குறைந்தபட்சமாக ரூ.30 லட்சம் செலவாகி இருக்கும். ஆனால், அரசு மருத்துவமனையில் முதல்வா் காப்பீட்டுத் திட்டத்தின் மூலம் முற்றிலும் கட்டணமின்றி சிகிச்சை அளிக்கப்பட்டது என்றனா்.

பேட்டியின் போது மருத்துவக் கண்காணிப்பாளா் குமரவேல், மயக்கவியல் துறை இயக்குநா் கல்யாணசுந்தரம், இருப்பிட மருத்துவ அதிகாரி சரவணன், மகப்பேறு துறை உதவிப் பேராசிரியை தங்கமணி, சித்ரா ஆகியோா் இருந்தனா்.