பெண்கள், குழந்தைகளுக்கு எதிரான குற்றத் தடுப்பு சட்டங்களை விழிப்புணா்வு, பொறுப்புணா்வுடன் அமல்படுத்துவதே சமுதாய நீதியாகும் என மதுரை மாவட்ட ஆட்சியா் கே.ஜே. பிரவீன்குமாா் தெரிவித்தாா்.

மாவட்ட சமூகநலன், மகளிா் உரிமைத் துறை சாா்பில் பெண் குழந்தைகளைக் காப்போம், கற்பிப்போம் என்ற திட்டத்தின் கீழ் மதுரையில் செவ்வாய்க்கிழமை நடைபெற்ற, பெண்கள், பெண் குழந்தைகளுக்கு எதிரான குற்றத் தடுப்பு நடவடிக்கைகள் குறித்த விழிப்புணா்வு கருத்தரங்க நிறைவு விழாவில் மேலும் அவா் பேசியதாவது :

பெண்கள், பெண் குழந்தைகளுக்கு எதிரான குற்றத் தடுப்பு நடவடிக்கைகள் குறித்து நிகழாண்டில் 20 கருத்தரங்கங்கள் நடத்தப்படும் என அரசு அறிவித்துள்ளது. இது, பெண்கள், பெண் குழந்தைகளுக்கு எதிரான குற்றத் தடுப்பு சட்டங்களை வலிமையுடன் களத்தில் செயல்படுத்தும் முக்கியவத்தை உணா்த்துவதாக உள்ளது.

குழந்தைத் திருமணத் தடை சட்டம், போக்ஸோ சட்டம், போஷ் சட்டம், வரதட்சிணைக் கொடுமை தடுப்புச் சட்டம், குடும்ப வன்முறைத் தடை சட்டம் போன்றவை குற்றங்களைத் தடுப்பதுடன், குற்றச் செயல்களில் ஈடுபட்டவா்களுக்கு சட்டம் வழியே தண்டனை பெற்றுத் தருபவையாக உள்ளன. எந்தச் சட்டமும் காதிதத்தில் வெற்றி பெறுவதில்லை. அவற்றை விழிப்புணா்வுடனும், பொறுப்புணா்வுடனும் களத்தில் அமல்படுத்துவதில் தான் சமுதாயத்தின் நீதி அடங்கியுள்ளது என்றாா் ஆட்சியா் கே.ஜே. பிரவீன்குமாா்.

முன்னதாக, விழிப்புணா்வு பதாகைகளை வெளியிட்ட ஆட்சியா், கருத்தரங்கத்தில் பங்கேற்ற அரசுத் துறை அலுவலா்களுக்கு சான்றிதழ்களை வழங்கினாா்.

மாவட்ட சமூக நல அலுவலா் காந்திமதி, மாவட்டத் திட்ட ஒருங்கிணைப்பாளா் கவிப்பிரியா, அரசுத் துறை அலுவலா்கள் கலந்து கொண்டனா்.