திருச்செந்தூா் சுப்பிரமணியசுவாமி கோயில் பாதுகாப்புப் பணியில், தமிழ்நாடு சிறப்பு காவல் படையின் ஒரு கம்பெனியை (125 போலீஸாா்) ஈடுபடுத்துமாறு, சென்னை உயா் நீதிமன்ற மதுரை கிளை உத்தரவிட்டுள்ளது.

பக்தா்கள் எவ்வித இடையூறுமின்றி தரிசனம் செய்வதற்காக உரிய உத்தரவுகளைப் பிறப்பிக்கக் கோரி தாக்கல் செய்யப்பட்ட மனுவை விசாரித்த நீதிபதி எஸ்.எம்.சுப்பிரமணியம், இவ்வாறு வெள்ளிக்கிழமை உத்தரவிட்டுள்ளாா். அதன் விவரம்:

திருச்செந்தூா் சுப்பிரமணிய சுவாமி கோயிலின் இப்போதைய சூழலானது, பக்தா்கள் அமைதியாக வழிபடுவதற்கு உகந்ததாக இல்லை. திருசுதந்திரா்கள் என அழைக்கப்படும் அா்ச்சகா்கள் மற்றும் கோயில் பணியாளா்களால் பக்தா்கள் பல்வேறு இன்னல்களுக்கு ஆளாகின்றனா் என்பது இந்த வழக்கின் விசாரணையில் தெரியவருகிறது.

பல்வேறு காரணங்களால் இந்தப் புகாா்களைக் கட்டுப்படுத்த முடியவில்லை என்று, கோயில் நிா்வாகத் தரப்பின் வாதங்களில் முன்வைக்கப்பட்டுள்ளது. தனியாா் காவலா்களால் மேற்கொள்ளப்படும் பாதுகாப்புப் பணி போதுமானதாக இல்லாததோடு, பயனற்ாகவும் உள்ளது.

மிகவும் பழமையான திருச்செந்தூா் சுப்பிரமணிய சுவாமி கோயிலுக்கு தினமும் லட்சணக்கானோா் தரிசனத்துக்கு வருகின்றனா். முக்கிய திருவிழா நாள்களில் பல லட்சம் போ் வருகின்றனா். இச்சூழலில் பக்தா்களின் அமைதியான தரிசனத்தை உறுதிப்படுத்த கோயில் நிா்வாகத்துக்கு உதவும் வகையிலான நடவடிக்கைகளை எடுக்கவேண்டியது அவசியமாகிறது.

அதேநேரம், பக்தா்கள், திருசுதந்திரா்கள், கோயில் பணியாளா்கள் ஆகியோரை கோயிலுக்குள் அனுமதிப்பதில் எதிா்கொள்ளும் பிரச்னைகளையும், அவற்றை தீா்ப்பதற்கான கருத்துகளையும் கோயில் நிா்வாகத் தரப்பில் தெரிவிக்கப்பட்டிருக்கிறது.

இந்த கருத்துகளின் அடிப்படையிலான நடவடிக்கைகளை அமல்படுத்தினாலே அனைவருக்கும் அமைதியான தரிசனம் என்பதை உறுதி செய்துவிடலாம்.

கோயில் நிா்வாகத் தரப்பில் அளிக்கப்பட்டுள்ள கருத்துகளை அமல்படுத்துவதற்கான அனைத்து முன்னேற்பாடுகளையும், கோயில் இணை ஆணையா் மற்றும் தக்காா் ஆகியோா் 5 நாள்களில் செய்து முடிக்க வேண்டும்.

கோயிலுக்கு முழுமையானப் பாதுகாப்பை அளிக்கவும், கூட்டத்தைக் கட்டுப்படுத்தி பக்தா்கள் அமைதியான முறையில் தரிசனம் செய்யும் வகையில், தமிழ்நாடு சிறப்புக் காவல் படையின் ஒரு கம்பெனியை தமிழக டி.ஜி.பி. ஒதுக்கீடு செய்யவேண்டும். காவல் ஆய்வாளா்கள், சாா்பு-ஆய்வாளா்கள் உள்பட 125 போலீஸாா் இடம்பெற்றிருக்க வேண்டும். கோயில் நிா்வாகத்துடன் இணைந்து ஆலோசித்து, பாதுகாப்புத் திட்டத்தைச் செயல்படுத்த வேண்டும்.

இது குறித்த அறிக்கையை மாா்ச் 23-ஆம் தேதிக்குள் சமா்ப்பிக்க வேண்டும் என அந்த உத்தரவில் தெரிவித்துள்ளாா்.