கண்ணங்குடி ஊராட்சி ஒன்றிய அலுவலகத்தில் தொழிலாளா்கள் காத்திருப்புப் போராட்டம்

சிவகங்கை மாவட்டம், கண்ணங்குடி ஊராட்சி ஒன்றிய அலுவலகம் முன்பு, மேல்நிலை நீா்த் தேக்கத் தொட்டி மற்றும் மோட்டாா் இயக்கும் தொழிலாளா்கள், துப்புரவுத் தொழிலாளா்கள், தூய்மைப் பணி காவலா்கள் சம்பள நிலுவைத் தொகையை உடனடியாக வழங்கக் கோரி திங்கள்கிழமை காத்திருப்புப் போராட்டத்தில் ஈடுபட்டனா்.

இப்போராட்டத்துக்கு ஊரக வளா்ச்சி மற்றும் உள்ளாட்சித் துறை ஊழியா் சங்கத்தின் மாநிலத் துணைத் தலைவா் வீரையா தலைமை வகித்தாா். குடிநீா் வடிகால் வாரியத் தொழிலாளா் சங்கத்தின் சிவகங்கை மாவட்டச் செயலா் சேவியா், கிராம ஊராட்சி ஊழியா்கள் சங்கத்தின் கண்ணங்குடி ஒன்றியச் செயலா் வெள்ளைச்சாமி, விவசாய சங்கத்தின் மாவட்டத் துணைத் தலைவா் பொன்னுச்சாமி, சாலை போக்குவரத்து தொழிலாளா் சங்கத்தின் சிவகங்கை மாவட்டச் செயலா் தெட்சிணாமூா்த்தி ஆகியோா் முன்னிலை வகித்தனா்.

இதில், கண்ணங்குடி ஒன்றியத்துக்குள்பட்ட கிராம ஊராட்சிகளில் பணியாற்றும் மேல்நிலை நீா்த் தேக்கத் தொட்டி மற்றும் மோட்டாா் இயக்கும் தொழிலாளா்கள், துப்புரவுத் தொழிலாளா்கள், தூய்மைப் பணி காவலா்கள் என மொத்தம் 50 பெண்கள் உள்பட 120 பேருக்கு கடந்த 7 மாதங்களுக்கான ஊதியம் வழங்கக் கோரியும், 7 ஆவது ஊதியக் குழு பரிந்துரையின் படி ஊதியம் வழங்கக் கோரியும் உணவு சமைப்பதற்கான சமையல் பாத்திரத்துடன் காத்திருப்பு போராட்டத்தில் ஈடுபட்டனா்.

இதுபற்றி தகவலறிந்த கண்ணங்குடி ஊராட்சி ஒன்றியக் குழுத் தலைவா் சரவண மெய்யப்பன், வட்டார வளா்ச்சி அலுவலா் அன்புச்செல்வி உள்ளிட்ட காவல்த் துறையினா் போராட்டத்தில் ஈடுபட்டவா்களிடம் பேச்சுவாா்த்தை நடத்தி, வரும் 9 ஆம் தேதிக்குள் தொழிலாளா்களுக்கு நிலுவையில் உள்ள சம்பளத்தை வழங்கி விடுவதாகவும், மற்ற கோரிக்கைகள் படிப்படியாக நிறைவேற்றப்படும் என உறுதியளித்ததை அடுத்து, அனைவரும் கலைந்து சென்றனா்.