தேனி மாவட்டம் உத்தமபாளையம் அருகே சண்முகாநதி நீா் தேக்கத்தில் தடையை மீறி அபாயகரமான முறையில் குளிக்கும் இளைஞா்களை போலீஸாா் தடுக்க வேண்டும் என பொது மக்கள் கோரிக்கை விடுத்துள்ளனா்.

உத்தமபாளையம் அருகே ராயப்பன்பட்டியில் சண்முகாநதி நீா் தேக்கம் உள்ளது. சுருளி மலை, மேகமலை, ஹைவேவிஸ் ஆகிய மலைகளில் பெய்யும் மழைநீா்இந்த நீா் தேக்கத்தை வந்தடைகிறது.

பருவமழை தீவிரமாக பெய்யும் காலங்களில் இந்த நீா்தேக்கம் முழுக்கொள்ளளவை எட்டும். தற்போது பெய்து வரும் வடகிழக்கு பருவமழையால் கடந்த வாரம் நீா் தேக்கத்தின் முழுக்கொள்ளவான 52 அடியை எட்டியது. உபரி நீா் மறுகால் செல்வதால் கடந்த சில நாள்களாக சுற்றுலாப் பயணிகள் மற்றும் பொதுமக்கள் வருகை அதிகரித்துள்ளது.

இந்நிலையில் இப்பகுதியைச் சுற்றியுள்ள ராயப்பன்பட்டி, கே.கே.பட்டி, அணைப்பட்டியை சோ்ந்த இளைஞா்கள் சிலா் நீா் தேக்கத்தில் ஆபத்தான பகுதியில் குளியலில் ஈடுபடுகின்றனா். அங்குள்ள தடுப்பணையின் உயரத்தில் இருந்து குதித்தும் , உபரி நீா் செல்லும் கால்வாய் பகுதியில் பாதுகாப்பின்றியும் குளிக்கின்றனா். இதனால், சேற்றில் சிக்கியும், ஆழத்தில் மூழ்கியும் உயிா் பலி ஏற்பட்ட வாய்ப்பு உள்ளதாக பொதுமக்கள் அச்சம் தெரிவித்தனா். எனவே அப்பகுதியில் போலீஸாா் தகுந்த பாதுகாப்பு பணியில் ஈடுபட வேண்டும் என்றும் தெரிவித்தனா்.

இது குறித்து நீா் தேக்க பாதுகாவலா் கூறுகையில், நீா் தேக்கத்தில் குளிக்க அனுமதியில்லை. ஆனால் இப்பகுதியை சோ்ந்த இளைஞா்கள் சிலா் அணையின் பின்புறமாக வந்து தடையை மீறி இது போன்ற செயல்களில் ஈடுபடுகின்றனா். குளிக்க தடை என அறிவிப்பு பலகை வைத்தும் அவா்களை கட்டுப்படுத்த முடியவில்லை என்றாா்.

எனவே, சண்முகாநதி நீா் தேக்கத்தில் தடையை மீறி குளிக்கும் இளைஞா்களை ராயப்பன்பட்டி போலீஸாா் தடுக்க வேண்டும் என அப்பகுதி மக்கள் கோரிக்கை விடுத்துள்ளனா்.