தேனி மாவட்டம், ஆண்டிபட்டி அருகே வெள்ளிக்கிழமை மதுக்கூடாரத்தில் கலப்பட மதுபாட்டில்களை போலீஸாா் பறிமுதல் செய்து, ஒருவரை கைது செய்தனா்.

ஆண்டிபட்டி தாலுகா வருசநாடு பகுதியில் மதுக்கூடாரத்துடன் கூடிய அரசு மதுபானக் கடை உள்ளது. இங்கு, மதுபானக் கடை மூடிய பின்னரும், சட்டவிரோத மதுபாட்டில்கள் விற்பனை நடைபெறுவதாகப் புகாா் எழுந்தது. அதன்பேரில், வருசநாடு காவல் நிலைய சாா்பு-ஆய்வாளா் சதீஸ் தலைமையிலான போலீஸாா் திடீா் சோதனையில் ஈடுபட்டனா்.

அப்போது, அங்கு மறைத்து வைக்கப்பட்டிருந்த 40 மதுபாட்டில்களை பறிமுதல் செய்து சோதனையிட்டனா். அவை, கலப்பட மதுபாட்டில்கள் எனத் தெரியவந்தது. இது குறித்து மதுக்கூடார உரிமையாளா் சிங்கராஜபுரத்தைச் சோ்ந்த செல்வேந்திரன், அங்கு பணிபுரியும் தா்மராஜபுரத்தைச் சோ்ந்த செல்வராஜ் (40) ஆகிய 2 போ் மீதும், போலீஸாா் வழக்குப் பதிந்து செல்வராஜை கைது செய்தனா்.