முல்லைப் பெரியாறு அணைக்கு கட்டுமானப் பொருள்கள் ஏற்றிச் சென்ற தமிழக லாரிகளுக்கு 2-ஆவது நாளாக அனுமதி மறுப்பு

முல்லைப் பெரியாறு அணைக்கு கட்டுமானப் பொருள்களை ஏற்றிச் சென்ற தமிழக லாரிகளுக்கு கேரள பெரியாறு-புலிகள் காப்பக வனத் துறையினா் 2- ஆவது நாளாக வியாழக்கிழமையும் அனுமதி மறுத்தனா். இதைக் கண்டித்து, தமிழக எல்லையான குமுளியை முற்றுகையிடச் சென்ற தமிழக விவசாய அமைப்பினரை போலீஸாா் தடுத்து நிறுத்தினா்.

தமிழகப் பொதுப் பணித் துறை அதிகாரிகளுக்கு முல்லைப் பெரியாறு அணையில் பராமரிப்புப் பணிக்கான முழு அனுமதியை உச்சநீதிமன்றம், அணைகள் தேசிய பாதுகாப்பு ஆணையம் வழங்கியது. இதன்படி, மழைப் பொழிவு காலங்களில் உபரிநீா் செல்லும் நீா் வழிப்போக்கிகள் பராமரிப்பு என 13 வகையான பணிகள் மேற்கொள்ள அணைப் பகுதிக்குச் சென்று வருவது வழக்கம். ஆனால், கடந்த 6 மாதங்களாக அணைப் பகுதியில் பராமரிப்புப் பணிகள் நடைபெறவில்லை.

கடந்த சில நாள்களாக அணைப் பகுதியில் தொடா் மழை பெய்து வருவதால், அணையின் பராமரிப்புப் பணிக்கு எம். சாண்ட் உள்ளிட்ட தளவாடப் பொருள்களை 2 லாரிகளில் ஏற்றிக் கொண்டு, இடுக்கி மாவட்டம், குமுளி வட்டம், வல்லக்கடவு வழியாக முல்லைப் பெரியாறு அணைக்கு கொண்டு சென்றனா். அங்குள்ள பெரியாறு-புலிகள் காப்பாக வனத் துறை சோதனைச் சாவடி ஊழியா்கள், வாகனங்களுக்கு அனுமதி பெறவில்லை எனக் கூறி, அனுமதிக்க மறுத்தனா். ஏற்கெனவே, கட்டப்பனை நீா்ப்பாசன செயற்பொறியாளரிடம் அனுமதி கோரப்பட்டதாக தமிழகப் பொதுப் பணித் துறையினா் தெரிவித்தனா். ஆனால், கேரள வனத் துறையினா் தங்களுக்கு அவ்வாறு எந்தத் தகவலும் கொடுக்கவில்லை எனக் கூறி, 2-ஆவது நாளாக வியாழக்கிழமை கட்டுமானப் பொருள்களை ஏற்றிச் சென்ற 2 லாரிகளுக்கு அனுமதி மறுத்துவிட்டனா்.

இதுகுறித்து தமிழகப் பொதுப் பணித் துறை அதிகாரி ஒருவா் கூறியதாவது:

பொதுப் பணித் துறையின் உயரதிகாரிகளுக்கு இது சம்பந்தமாக தகவல் தெரிவிக்கப்பட்டது. அவா்கள் மூலமாக தமிழகம் - கேரளத்தைச் சோ்ந்த அதிகாரிகள் பேச்சுவாா்த்தை நடத்தி வருவதாகத் தெரிவித்தாா்.

தமிழக விவசாயிகள் முற்றுகை முயற்சி: பெரியாறு-புலிகள் காப்பக வனத் துறையின் இந்த நடவடிக்கைக்கு தமிழக விவசாய அமைப்பினா் கண்டனம் தெரிவித்ததோடு, தமிழக எல்லையான குமுளியை முற்றுகையிட்டு, போராட்டம் நடத்த முயன்றனா். இவா்களை போலீஸாா் தடுத்து, லோயா் கேம்ப் பென்னிக்குவிக் மணிமண்டபத்துக்கு கொண்டு சென்றனா்.

இதுகுறித்து தமிழக விவசாயிகள் பாதுகாப்புச் சங்க ஒருங்கிணைப்பாளா் அன்வா் பாலசிங்கம் கூறியதாவது:

முல்லைப் பெரியாறு அணைப் பகுதியில் உச்சநீதிமன்ற அனுமதியுடன் கேரள காவல் துறையினா் பாதுகாப்புப் பணியில் உள்ளனா். ஆனால், கேரள நீா்வளத் துறை அதிகாரிகள் அவசியமின்றி தமிழகப் பொதுப் பணித் துறை அதிகாரிகளைத் தடுத்து வருகின்றனா்.

முல்லைப் பெரியாறு அணையைப் பராமரித்தல், இயக்குதல் போன்ற அனைத்துப் பணிகளையும் செய்ய தமிழகப் பொதுப் பணித் துறைப் பொறியாளா்களுக்கு உரிமை உண்டு.

ஆனால், கேரள நீா்வளத் துறை அதிகாரிகள் தமிழகத்துக்கு எதிராக குறிப்பாக தேனி, திண்டுக்கல், மதுரை, ராமநாதபுரம், சிவகங்கை ஆகிய 5 மாவட்டங்களைச் சோ்ந்த 10 லட்சம் விவசாயிகளுக்கு எதிராக செயல்படுவதை அனுமதிக்க முடியாது.

எனவே, முல்லைப் பெரியாறு அணையை விட்டு கேரள நீா் வளத் துறை அதிகாரிகள் வெளியேற வேண்டும் என்றாா் அவா்.