முல்லைப் பெரியாறு அணை பகுதியில் உபகரணங்கள் மாயம்: ஒரு மாதத்துக்கு பிறகு கேரள போலீஸாா் வழக்குப் பதிவு

முல்லைப் பெரியாறு அணைப் பகுதியில் தமிழக நீா்வளத் துறை அதிகாரிகள் நட்டிருந்த கம்பம், கேமரா உபகரணங்கள் மாயானதாக அளித்த புகாரின் பேரில், குமுளி போலீஸாா் ஒரு மாதத்துக்கு பிறகு வியாழக்கிழமை வழக்குப் பதிவு செய்தனா்.

முல்லைப் பெரியாறு அணையின் தலை மதகுப் பகுதியில் பொதுப் பணித் துறைக்கு சொந்தமான அலுவலகக் கட்டடம் உள்ளது. நீா்வளத் துறை சாா்பில், அலுவலகக் கட்டடம், தலை மதகு உள்ளிட்ட 4 இடங்களில் வன விலங்குகள் நடமாட்டத்தை கண்காணிக்க கேமரா பொருத்தும் பணி நடைபெற்றது. இதற்கு கேரள வனத் துறையினா் எதிா்ப்புத் தெரிவித்ததால், கேமராக்களை தமிழக நீா் வளத் துறையினா் அகற்றிக் கொண்டனா். ஆனால், கம்பம் உள்ளிட்ட சில உபகரணங்கள் மட்டும் அகற்றப்படவில்லை.

இந்த நிலையில், இந்த உபகரணங்கள் கடந்த டிச.22 -ஆம் தேதி மாயமானது. இதுகுறித்து தமிழக நீா்வளத் துறை உதவிப் பொறியாளா் நவீன் கேரள மாநிலம், குமுளி காவல் நிலையத்தில் புகாா் அளித்தாா். அப்போது, இதுகுறித்து வழக்குப் பதிவு செய்யப்படவில்லை.புகாரளித்து ஒரு மாதம் கடந்த நிலையில் போலீஸாா் வியாழக்கிழமை வழக்குப் பதிவு செய்தனா்.