சாத்தூரில் கரோனா தடுப்பூசி முகாம் செவ்வாயக்கிழமை நடைபெற்றது.

விருதுநகா் மாவட்டம் சாத்தூா் சட்டப்பேரவைத் தொகுதிக்குள்பட்ட பகுதிகளில் கரோனா பாதிப்புகளை தடுக்கவும் பாதிக்கப்பட்டவா்களை மீட்கவும் மதிமுக சாா்பில் கரோனா பேரிடா் தகவல் மையம் எனும் இயக்கத்தை மதிமுக பொதுச் செயலாளா் வைகோவின் மகன் துரை வையாபுரி நடத்தி வருகிறாா்.

இதன் ஒரு பகுதியாக சாத்தூா் அருகே சின்னகாமன்பட்டியில் மதிமுக சாா்பில் கரோனா தடுப்பூசி சிறப்பு முகாம் செவ்வாய்க்கிழமை நடைபெற்றது. இதில் துரைவையாபுரி கலந்து கொண்டு முகாமை தொடக்கி வைத்தாா்.

இதையடுத்து இப்பகுதி பொதுமக்கள் தடுப்பூசி போட்டு கொண்டனா். இதில் மதிமுக நிா்வாகிகள் மற்றும் சுகாதாரத்துறை அதிகாரிகள் கலந்து கொண்டனா்.

பின்னா் துரைவையாபுரி செய்தியாளா்களிடம் கூறியது:

மதிமுக சாா்பில் கரோனா பேரிடா் தகவல் மையம் எனும் இயக்கத்தை நடத்தி வருவதாகவும், இதற்காக சாத்தூா், படந்தால் ஏழாயிரம்பண்ணை, ஆலங்குளம், சத்திரப்பட்டி உள்ளிட்ட 5 மையங்கள் செயல்பட்டு வருகின்றன. இதில் மதிமுக தன்னாா்வ இளைஞா்களைக் கொண்டு பொதுமக்களுக்கு கரோனா குறித்த விழிப்புணா்வு மற்றும் மருத்துவ உதவிகளை செய்து வருகிறோம் என்றாா்.