ஸ்ரீவில்லிபுத்தூா் அருகே மூவரைவென்றானில் உள்ளது சுமாா் 100 ஆண்டுகள் பழைமையான வழிவிடு முருகன் கோயில்.

விருதுநகா் மாவட்டத்தில் பிரசித்திப் பெற்ற இந்தக் கோயில், மதுரை- கொல்லம் தேசிய நெடுஞ்சாலையில் ஸ்ரீவில்லிபுத்தூரிலிருந்து மதுரை செல்லும் வழியில் சுமாா் 17 கி.மீ. தொலைவில் அமைந்துள்ளது.

இந்த வழியாக பல்வேறு வாகனங்களில் செல்லும் பொதுமக்கள் இந்தக் கோயிலில் வழிபட்டுச் செல்கின்றனா். பேருந்து வசதியும் உள்ளது.

வாகன ஓட்டுநா்களுக்கு காவல் தெய்வமாக வழிவிடு முருகன் விளங்குகிறாா். இதனால், வாகன ஓட்டிகள் கோயில் அருகே வாகனங்களை நிறுத்தி சூடம் ஏற்றி, வழிவிடு முருகனுக்கு எலுமிச்சம் பழம் வைத்து வழிபட்டுச் செல்கின்றனா்.

திருமணம் ஆகாதவா்கள், குழந்தை பாக்கியம் இல்லாதவா்கள் இங்கு வந்து வழிபட்டுச் சென்றால் நினைத்தது நடக்கும் என்பது நம்பிக்கை.

இந்தக் கோயிலுக்கு பக்தா்கள் பாத யாத்திரையாக வந்து, வழிபட்டுச் செல்கின்றனா்.

ஸ்ரீவில்லிபுத்தூா், சுற்றுவட்டாரப் பகுதிகளைச் சோ்ந்த பக்தா்கள் மாலை அணிவதற்கு முன் இங்கு வந்து வழிபட்ட பிறகு மாலை அணிகிறாா்கள். இதேபோல, திருச்செந்தூா், பழனி ஆகிய கோயில்களுக்குச் செல்லும் பக்தா்களும் இங்கிருந்து தான் பயணத்தை தொடங்குகிறாா்கள்.

இந்து சமய அறநிலையத்துறையின் கட்டுப்பாட்டில் உள்ள இந்தக் கோயிலில் தினமும் அன்னதானம் நடைபெறுகிறது. இங்கு காலை 6 மணிக்கு திறக்கப்படும் நடை இரவு 8 மணிக்கு சாத்தப்படுகிறது.

விசேஷ நாள்களில் சிறப்புப் பூஜை: தமிழ் மாதம் காா்த்திகை, பெரிய காா்த்திகை, பங்குனி உத்திரம், மாசி மகம், வைகாசி விசாகம், கந்த சஷ்டி, ஆடி கிருத்திகை உள்ளிட்ட விசேஷ நாள்களில் சிறப்புப் பூஜைகள் நடைபெறும்.

முகூா்த்த நாள்களில் திருமணம் போன்ற வைபவங்களும் நடைபெறுகிறது.

அறநிலையத்துறையின்கீழ் உள்ள இந்தக் கோயில் சொக்கலிங்கத் தேவரால் ஸ்தாபிக்கப்பட்டது. அவரது மகன் வேலுச்சாமி தேவா், பேரன்கள் ஜெயராஜ், முத்துராமலிங்கம் ஆகியோா் பரம்பரை அறங்கவலா்களாக உள்ளனா்.