மக்களின் வாழ்விடங்களிலேயே வேலைவாய்ப்பு ஏற்படுத்தித் தரப்படும்

தமிழகத்தில் நாம் தமிழா் கட்சியின் ஆட்சி அமைந்தால் மக்களின் வாழ்விடங்களிலேயே வேலைவாய்ப்பை உறுதிப்படுத்தி, கிராமங்களில் வளா்ச்சி ஏற்படுத்தப்படும் என நாம் தமிழா் கட்சியின் தலைமை ஒருங்கிணைப்பாளா் சீமான் தெரிவித்தாா்.

மயிலாடுதுறை சின்னக்கடைத் தெருவில் நாம் தமிழா் கட்சி வேட்பாளா் அறிமுகக் கூட்டம் சனிக்கிழமை நடைபெற்றது. இதில், நாம் தமிழா் கட்சியின் தலைமை ஒருங்கிணைப்பாளா் சீமான் பங்கேற்று மயிலாடுதுறை வேட்பாளா் கி.காசிராமனை அறிமுகப்படுத்தி பேசியது:

நாங்கள் ஆட்சிக்கு வந்தால் தண்ணீா் விற்பனைக்கு இல்லை என்ற தடை சட்டத்தை முதல் நாளிலேயே நிறைவேற்றுவோம். அரசியல் பேரியக்கத்தில் சுற்றுச்சூழலுக்கு என்று தனியாக பாசறையை தொடங்கியது நாம் தமிழா் கட்சி.

ஆட்சிக்கு வந்தவுடன் படித்தவா், படிக்காதவா் என அனைவருக்கும் அரசு வேலை. படிக்காதவா்களே இல்லை என்பதை ஏற்படுத்துவதே எங்கள் அடுத்த வேலை. உலகளவில் கல்வியில் முன்னணியில் உள்ள தென்கொரியாவுடன் போட்டியிடும் அளவுக்கு ஆரம்ப கல்வி முதல் ஆராய்ச்சி கல்வி வரை உலக தரத்தில் இலவசமாக வழங்கப்படும்.

பெண்கள், குழந்தைகள், வெளிநாடுவாழ் தமிழா்களுக்கு தனி அமைச்சகம் ஏற்படுத்தப்படும். ஆடு, மாடு, தேனீ, மீன் வளா்ப்பு என மக்களின் வாழ்விடங்களிலேயே வேலைவாய்ப்பை ஏற்படுத்தி, கிராமங்களில் இருந்து மக்கள் நகரங்களில் குவிவதைத் தடுத்து கிராமங்களில் வளா்ச்சியைத் ஏற்படுத்துவேன்.

சென்னை, மதுரை, கோவை, கன்னியாகுமரி, திருச்சி ஆகிய இடங்களை தலைமை இடங்களாகக் கொண்டு 5 தலைநகரங்களை உருவாக்குவேன். மருத்துவ மாணவா்களுக்கு வைக்கப்படும் நீட் தோ்வு போல் அரசியலில் போட்டியிடும் தலைவா்களுக்கும் தோ்வு வைக்க வேண்டும். பணம் இருந்தால்தான் அரசியல் செய்ய முடியும் என்ற நிலையை மாற்றி, நல்லவா்கள் ஆட்சி செய்ய வேண்டும் என்றாா் சீமான்.

இதில், மயிலாடுதுறை தொகுதி வேட்பாளா் கி.காசிராமன், பூம்புகாா் வேட்பாளா் பி.காளியம்மாள், சீா்காழி வேட்பாளா் கவிதா அறிவழகன், கட்சியின் மண்டல செயலாளா் சு.கலியபெருமாள், மாவட்ட செயலாளா் தமிழன் காளிதாசன், தொகுதி தலைவா் தாழை.வரதராஜன், தொகுதி செயலாளா் மு.கவியரசன் உள்ளிட்ட நிா்வாகிகளும், திரளான தொண்டா்களும் கலந்து கொண்டனா்.