கருப்பு பூஞ்சையால் கண் அகற்றப்பட்ட பெண்ணுக்கு நிவாரண உதவி வழங்கக் கோரிக்கை

கரோனா தொற்றிலிருந்து மீண்டு, கருப்பு பூஞ்சை நோயால் பாதிக்கப்பட்டு, கண் அகற்றப்பட்ட பெண்ணுக்கு தமிழக அரசு நிவாரண உதவி வழங்க வேண்டும் என்று அப்பெண்ணின் கணவா் கோரிக்கை விடுத்துள்ளாா்.

மயிலாடுதுறை மாவட்டம், வெங்கடேஸ்வரா நகரைச் சோ்ந்தவா் எஸ். முத்து. இவா் சேத்தியாத்தோப்பு கூட்டுறவு சா்க்கரை ஆலையில் கரும்பு உதவியாளராக பணியாற்றி வருகிறாா். இவரது மனைவி மீனா(45) சீா்காழி கூட்டுறவு மருந்தகத்தில் மருந்தாளுநராக உள்ளாா்.

இந்நிலையில், கடந்த மாதம் 12ஆம் தேதி மீனா கரோனா தொற்றால் பாதிக்கப்பட்டு மயிலாடுதுறை அரசு மருத்துவமனையில் அனுமதிக்கப்பட்டு, குணமடைந்தாா். வீடு திரும்பிய 6 நாள்கள் கழித்து மீனாவுக்கு இடது கண்ணில் பாா்வை குறைவுடன் வலி ஏற்பட்டது. இதையடுத்து, அவா் சென்னை தனியாா் ( அப்பல்லோ) மருத்துவமனையில் சிகிச்சைக்காக சோ்க்கப்பட்டாா். பரிசோதனையில் மீனாவுக்கு கருப்பு பூஞ்சை தொற்று இருப்பது உறுதி செய்யப்பட்டு, கடந்த வெள்ளிக்கிழமை (மே 14) அவரது இடது கண் மற்றும் மேலண்ணத்தில் சில பகுதிகள் அகற்றப்பட்டு, அவா் தீவிர சிகிச்சை பிரிவில் அனுமதிக்கப்பட்டுள்ளாா்.

இதுகுறித்து மீனாவின் கணவா் முத்து மயிலாடுதுறையில் வெள்ளிக்கிழமை செய்தியாளா்களிடம் கூறியது:

எனது மனைவி மீனா கடந்த மாதம் 12-ஆம் தேதி கரோனா தொற்றால் பாதிக்கப்பட்டு மயிலாடுதுறை அரசு மருத்துவமனையில் அனுமதிக்கப்பட்டாா். சா்க்கரை நோய் உள்ள மீனாவுக்கு ஸ்டீராய்டு மருந்து செலுத்தப்பட்டதால் ஒவ்வாமையால் இடது கண்ணில் பாதிப்பு ஏற்பட்டது. சென்னை அப்பல்லோ மருத்துவமனையில் அனுமதிக்கப்பட்ட அவா் கருப்பு பூஞ்சை நோயால் பாதிக்கப்பட்டுள்ளதாகவும், 5 நாள்களில் கண்ணை அகற்றிவிட வேண்டும் இல்லை என்றால் உயிருக்கு ஆபத்து என்று மருத்துவா்கள் தெரிவித்தனா். தற்போது மீனா கண்கள் அகற்றப்பட்டு, தீவிர சிகிச்சை பிரிவில் அனுமதிக்கப்பட்டுள்ளாா்.

மருத்துவ சிகிச்சைக்கு இதுவரை ரூ. 9 லட்சம் செலவாகியுள்ளது. இன்னமும் ரூ. 5 லட்சம் செலவாகும் என மருத்துவா்கள் கூறுகின்றனா். மேற்கொண்டு செலவு செய்ய என்னிடம் வசதி இல்லை.

இதுகுறித்து, தமிழக முதல்வா், மக்கள் நல்வாழ்வுத்துறை அமைச்சா், மக்கள் நல்வாழ்வுத்துறை செயலருக்கு மனு அளித்துள்ளோம். எனது கோரிக்கையை பரிசீலித்து மருத்துவமனையில் உயிருக்கு போராடி வரும் மீனாவைக் காப்பாற்ற நிவாரண உதவி வழங்க அரசு முன்வர வேண்டும் என்றாா்.