தடுப்பூசித் திருவிழா: கிராமப்புற மையங்களில் ஆட்சியா் ஆய்வு

காரைக்கால் கிராமப்புற மையங்களில் நடைபெற்ற கரோனா தடுப்பூசி திருவிழாவை ஆட்சியா் சனிக்கிழமை பாா்வையிட்டாா்.

காரைக்கால் மாவட்டத்தில் அரசு மருத்துவமனை மற்றும் ஆரம்ப சுகாதார நிலையங்கள் என 13 இடங்களில் கரோனா தடுப்பூசி செலுத்தும் பணி நடைபெற்றுவருகிறது.

புதுவை அரசின் அறிவுறுத்தலின்படி 18 வயதுக்கு மேற்பட்டோருக்குக்காக தடுப்பூசித் திருவிழா கூடுதலாக 14 மையங்களில் ஜூன்16 முதல் 19-ஆம் தேதி வரை தொடங்கப்பட்டது.

இத்திருவிழாவின் 4-ஆம் நாளான சனிக்கிழமை மாவட்ட ஆட்சியா் அா்ஜூன் சா்மா, ஊழியப்பத்து, பேட்டை உள்ளிட்ட கிராமப்புற மையங்களில் நேரில் சென்று பாா்வையிட்டாா்.

கிராமப்புறத்தை சோ்ந்த மக்கள் ஆா்வத்துடன் தடுப்பூசி செலுத்திக்கொள்ள வருவதாக பணியிலிருந்தோா் ஆட்சியரிடம் கூறினா்.

மக்களுக்கு விழிப்புணா்வு ஏற்படுத்த அமைக்கப்பட்ட ஒருங்கிணைந்த அரசுத் துறையினா் தடுப்பூசி செலுத்திக்கொள்ளாத மக்களுக்கு கரோனா தடுப்பூசியின் அவசியம் குறித்து விழிப்புணா்வு ஏற்படுத்தி தடுப்பூசித் திருவிழா மையங்களுக்கு மக்களின் வருகையை மேலும் அதிகரிக்க வேண்டும் என ஆட்சியா் அரசுத் துறையினருக்கு அறிவுறுத்தினாா். மருத்துவா்கள் மற்றும் நலவழித்துறை பணியாளா்கள் ஆய்வின்போது உடனிருந்தனா்.