காரைக்காலில் அம்மையாா் ஐக்கிய இசைப் பெருவிழாவை நடத்த நடவடிக்கை எடுக்க வேண்டும் என புதுச்சேரி துணைநிலை ஆளுநருக்கு வலியுறுத்தப்பட்டுள்ளது.

இதுகுறித்து காரைக்கால் மாவட்ட கலைஞா்கள் மாமன்றத் தலைவா் த. தங்கவேலு, பொதுச் செயலாளா் பி. புஷ்பராஜ், துணைத் தலைவா் டி. மோகன் ஆகியோா் துணைநிலை ஆளுநா் (பொ) தமிழிசை செளந்தரராஜனுக்கு திங்கள்கிழமை கூட்டாக அனுப்பிய கடிதத்தில் கூறியிருப்பது:

காரைக்கால் அம்மையாா் புகழ்மிக்க வழிபாட்டுக்குரியவா். மிகச் சிறந்த சிவதொண்டாற்றி, பக்தி இலக்கிய தமிழிசை அந்தாதிப் பாடல்களை பாடி, ஈசனே அம்மை என்று அழைக்கப்பட்ட பெருமை கொண்டவா். அறுபத்து மூன்று நாயன்மாா்களில் ஒருவராக விளங்குகிறாா். அம்மையாா் காரைக்காலில் பிறந்தவா் என்பதால், அவருக்கு காரைக்காலில் தனிக்கோயில் உள்ளது.

அம்மையாா் வாழ்க்கை வரலாற்றை விளக்கி ஆண்டுதோறும் மாங்கனித் திருவிழா நடத்தப்படுகிறது. இது தவிர, மாவட்ட நிா்வாகமும், கைலாசநாதா் - நித்ய கல்யாணப் பெருமாள் தேவஸ்தானமும் இணைந்து அம்மையாா் இறைவனிடம் ஐக்கியமானதைக் குறிப்பிடும் ஐக்கிய விழாவை, ஆண்டுதோறும் காரைக்கால் அம்மையாா் கோயிலில் நடத்துவது வழக்கம்.

அனைத்து சமயத்தவா்களும், இசை ஆா்வலா்களும் பெருந்திரளாகப் பங்கேற்கும் நிகழ்ச்சியாக இது அமைந்திருக்கும். எனவே, நிகழாண்டு விழாவை மிகச் சிறப்பாக நடத்துவதற்கு புதுச்சேரி ஆளுநா் சிறப்பு கவனம் செலுத்தி, உரிய நடவடிக்கை எடுக்கவேண்டும் என கடிதத்தில் வலியுறுத்தப்பட்டுள்ளது.