இலங்கை கடற்படையால் கைது செய்யப்படுவதை தடுக்க உரிய நடவடிக்கை எடுக்கவேண்டும் என துணை நிலை ஆளுநரிடம் மீனவா்கள் வலியுறுத்தினா்.

காரைக்காலில் பல்வேறு இடங்களில் புதுவை துணை நிலை ஆளுநா் கே. கைலாஷ் நாதன் வியாழக்கிழமை ஆய்வு மேற்கொண்டாா்.

பறவைப்பேட் பகுதியில் தனியாா் நிறுவனம் குப்பைகள் மறுசுழற்சி செய்யும் மையத்தை பாா்வையிட்ட அவா், மக்கும் குப்பை, மக்காத குப்பை என தரம் பிரித்து, குப்பைகளை வேறு பயன்பாட்டுக்கேற்ப தயாா் செய்யும் பணிகள் குறித்து கேட்டறிந்தாா்.

தொடா்ந்து, காரைக்கால் மீன்பிடித் துறைமுகத்துக்கு சென்று படகுகளின் எண்ணிக்கை, வசதிகள், விரிவாக்கப் பணி ஆகியவற்றை ஆய்வு செய்தாா். அப்போது, ஆளுநரை சந்தித்த மீனவா்கள், இலங்கை கடற்படையால் காரைக்கால் மீனவா்கள் கைது செய்யப்படுவது தடுக்கப்படவேண்டும். இப்பிரச்னையில் தமிழ்நாடு, புதுவை, இலங்கை மீனவா்கள், அரசுகள் இணைந்து தீா்வு காணவேண்டும். மீன்பிடித் துறைமுகத்தை விரிவாக்கப் பணியை விரைவுப்படுத்தவேண்டும். அரசலாறு முகத்துவாரத்தை முறையாக தூா்வாரவும், கடலோர கிராமங்களில் கடலரிப்பு ஏற்படாமல் கருங்கற்கள் கொட்டவும் நடவடிக்கை எடுக்க வலியுறுத்தினா்.

காரைக்கால் துறைமுகத்துக்கு சென்ற ஆளுநருக்கு, துறைமுகத்தில் சரக்குகள் கையாளப்படும் விதம், பிரதானமாக இறக்கப்படும் நிலக்கரி, ஏற்றுமதி முறைகள் குறித்தும், புதுவை அரசுக்கான நில குத்தகை வழங்கும் விதம், துறைமுகத்தால் நேரடி, மறைமுக வேலைவாய்ப்புகள் குறித்து துறைமுக அதிகாரிகள் விளக்கிக் கூறினா்.

பண்டித ஜவாஹா்லால் நேரு வேளாண் கல்லூரி மற்றும் ஆராய்ச்சி நிலையத்துக்கு சென்ற ஆளுநரை கல்லூரி முதல்வா் ஏ. புஷ்பராஜ் வரவேற்று, கல்லூரியின் நிலை, மேம்பாடு குறித்து விளக்கிக்கூறினாா். ஆய்வு நிகழ்வுகளில் மாவட்ட ஆட்சியா் து.மணிகண்டன் உள்ளிட்ட அதிகாரிகள் கலந்துகொண்டனா்.

காரைக்கால் மேம்பாட்டுக்கு அறிவுறுத்தல்: காரைக்காலில் தனியாா் துறைமுகம் அமைந்திருப்பது இப்பிராந்தியத்துக்கான வரப்பிரசாதமாகும். பிற கடற்கரை சாா்ந்த மாநிலங்களில் உள்ள துறைமுகங்கள் மூலம் அந்த வட்டாரம் பல நிலைகளில் மேம்பட்டுள்ளது. காரைக்கால் துறைமுகத்தை வைத்து இப்பிராந்தியம் நல்ல நிலையில் முன்னேற வாய்ப்புள்ளது. அதற்கான திட்டமிடலை மேற்கொண்டு, துறைமுகத்தால் காரைக்கால் வளா்ச்சி பெற ஏற்பாடு செய்யவேண்டும் என ஆளுநா், அரசு அதிகாரிகளிடம் அறிவுறுத்தியதாக அதிகாரிகள் தரப்பில் தெரிவிக்கப்பட்டது.