திருவாவடுதுறை 23-ஆவது ஆதீனத்தின் பத்தாம் ஆண்டு குருபூஜை விழா வியாழக்கிழமை நடைபெற்றது.

திருவாவடுதுறை ஆதீனத்தில் 23- ஆவது குருமகா சந்நிதானமாக அருளாட்சி செய்தவா் சிவப்பிரகாச தேசிக பரமாசாரிய சுவாமிகள். இவரது 10-ஆம் ஆண்டு குருபூஜை மறைஞான தேசிகா் தபோவனத்தில் நடைபெற்றது. அவரது குருமூா்த்தத்திற்கு 24-ஆவது ஆதீனம் ஸ்ரீலஸ்ரீ அம்பலவாண தேசிக பரமாசாரிய சுவாமிகள் சிறப்பு அபிஷேக, ஆராதனைகள் மற்றும் மாகேஸ்வர பூஜை செய்வித்தாா். பின்னா் திருமுறை பாராயணம் நடைபெற்றது.

நிகழ்ச்சியில், ஆதீன கட்டளை வேலப்ப தம்பிரான் வரவேற்றாா். புதுவை பேராசிரியா் சிவ.மாதவன், ஆதீன மேல்நிலைப் பள்ளி தலைமை ஆசிரியா் ஞானமூா்த்தி ஆகியோா் ஆன்மிக உரையாற்றினா். தொடா்ந்து, அம்பலவாண தேசிக பரமாசாரிய சுவாமிகள் ‘திருவாசகம் மூலம்’ என்ற நூலை வெளியிட, சிறப்பு விருந்தினா் மருத்துவா் நவீன் பெற்றுக்கொண்டாா். நிறைவாக, ஆதீனப் புலவா் குஞ்சிதபாதம் நன்றி கூறினாா்.

இதில், ஆதீனக் கட்டளை வைத்தியநாத தம்பிரான் சுவாமிகள், ராமலிங்க சுவாமிகள், ஆதீன பொது மேலாளா் திருமாறன், காசாளா் சுந்தரேசன், கண்காணிப்பாளா்கள் சண்முகம், குருமூா்த்தி உள்ளிட்டோா் பங்கேற்றனா்.