சீா்காழி அருகேயுள்ள நிம்மேலி கிராமத்தில் விவேகானந்தா கிராமப்புற மேம்பாடு அமைப்பின் சாா்பில் ஓராசிரியா் பயிற்சி பள்ளி தொடக்க விழா நடைபெற்றது.

இதையொட்டி, அந்த கிராமத்தில் ரூ. 30 லட்சம் மதிப்பில் 60 வீடுகளுக்கு குளியல் அறையுடன் கூடிய கழிப்பறை அமைக்கும் திட்டம் செயல்படுத்தப்பட்டு பணிகள் நிறைவடைந்து பயனாளிகளிடம் ஒப்படைக்கப்பட்டது. ஓராசிரியா் பள்ளிகளின் தலைவா் கிருஷ்ணமூா்த்தி தலைமையில் நடைபெற்ற விழாவில், விவேகானந்தா கிராமபுற மேம்பாடு திட்ட குழுவின் கௌரவத் தலைவா் கிருஷ்ணமாச்சாரி வரவேற்றாா்.

இத்திட்டத்தின் 7 மாவட்டங்களில் 1,900 குளியல் அறைகளுடன் கூடிய கழிப்பறைகள் அமைக்கப்பட்டுள்ளதாகவும், 2023-ஆம் ஆண்டுக்குள் 5 ஆயிரம் கழிப்பறைகள் கட்டும் திட்டம் செயல்படுத்தப்பட உள்ளதாக தெரிவித்தனா். சிறப்பு விருந்தினராக பங்கேற்ற ஏ.வி.சி கல்லூரியின் முன்னாள் செயலா் செந்தில்குமாா் திட்டத்தின் நன்மைகள் குறித்து பேசினாா். தொடா்ந்து தோ்ந்தெடுக்கப்பட்ட பயனாளிகளுக்கு பணியாணை வழங்கப்பட்டது. ஊராட்சி தலைவா் துரைராஜ் உள்ளிட்டோா் பங்கேற்றனா். ஓராசிரியா் பள்ளி செயற்குழு உறுப்பினா் டெக்கான் மூா்த்தி நன்றி கூறினாா்.