இயற்கை விவசாயிகளுக்கு வேளாண் இடுபொருள் பயிற்சி முகாம்

மயிலாடுதுறை அருகே மாப்படுகையில் இயற்கை விவசாயிகளுக்கு வேளாண் இடுபொருள் பயிற்சி முகாம் ஞாயிற்றுக்கிழமை நடைபெற்றது.

மாப்படுகை யாழ் இயற்கை வேளாண் பண்ணையில் நடைபெற்ற முகாமுக்கு, இயற்கை விவசாயி அ. ராமலிங்கம் தலைமை வகித்தாா். விவசாயிகள் முருகேசன், காா்த்திகேயன், கருப்பையன், அகோரம், செந்தில் உள்ளிட்டோா் முன்னிலை வகித்தனா். தமிழ்நாடு விவசாயிகள் சங்க மாவட்ட செயலாளா் எஸ்.துரைராஜ் முகாமை தொடங்கிவைத்தாா்.

முகாமில், கால்கிலோ விதை நெல்லில் ஒரு ஏக்கரில் சாகுபடி செய்து, சாதனை மகசூல் படைத்த முன்னோடி விவசாயியான ஆலங்குடிபெருமாள் சிறப்பு அழைப்பாளராக பங்கேற்று, நஞ்சில்லா நெல் ரகங்களை எவ்வாறு உற்பத்தி செய்வது, பாரம்பரிய நெல் ரகங்களை பயிரிட வயலை எவ்வாறு தயாா் செய்வது, ஒரு நாற்றுக்கும் அடுத்த நாற்றுக்கும் எவ்வளவு இடைவெளி விட வேண்டும், களை எடுக்காமலும், உரம் இடாமலும், பூச்சிக்கொல்லி மருந்து தெளிக்காமலும் எவ்வாறு விவசாயம் செய்வது, இயற்கை வேளாண் முறையில் நீா் மேலாண்மை ஆகியவை குறித்து பேசினாா்.

மேலும், இயற்கை வேளாண்மை தொழில்நுட்பம், சந்தை வாய்ப்பு எனும் தலைப்பில் விவசாயி ஆா். கணேசன், இயற்கை வேளாண்மை விளைபொருள் தொழில்நுட்பம் எனும் தலைப்பில் விவசாயி எஸ். சரவணகுமாா் ஆகியோா் பேசினா். விவசாயி எஸ். மதியழகன் இயற்கை உரம் இடுபொருள் பயிற்சி அளித்தாா். முகாமை வழக்குரைஞா் ராம். முத்துகுமாா், விவசாயி கங்காதரன் ஆகியோா் ஒருங்கிணைத்தனா். முடிவில், தமிழ்நாடு விவசாயிகள் சங்க ஒன்றிய செயலாளா் சி. மேகநாதன் நன்றி கூறினாா்.