நாகை மாவட்டம், தரங்கம்பாடி வட்டம், எடுத்துக்கட்டி கிராமத்தில் காரணமின்றி 2 மாதங்களாக நிறுத்தி வைக்கப்பட்டுள்ள முதியோர் உதவித்தொகையைத் தொடர்ந்து வழங்க வலியுறுத்தி, வட்டாட்சியரிடம் பாதிக்கப்பட்டவர்கள் செவ்வாய்க்கிழமை மனு அளித்தனர்.
எடுத்துக்கட்டி ஊராட்சியைச் சேர்ந்த 40-க்கும் மேற்பட்ட முதியோருக்கு அரசு வழங்கக்கூடிய முதியோர் உதவித் தொகை கடந்த 2 மாதங்களாக வழங்கப்படாமல் நிறுத்தி வைக்கப்பட்டுள்ளது. எனவே, இதன் மீது நடவடிக்கை எடுக்க கோரி, தரங்கம்பாடி வட்டாட்சியரிடம் மனு அளித்துள்ளனர். 
இதுகுறித்து எடுத்துக்கட்டி ஊராட்சியின் முன்னாள் தலைவரும், முதியோர் பாதுகாப்புக்குழு தொடர்பாளருமான மனோகரன் கூறியது:  எடுத்துக்கட்டி கிராமத்தில் முதியோர், மாற்றுத்திறனாளிகள், விதவைகள் என 350 பேருக்கு மாதந்தோறும் உதவித்தொகை கிடைத்து வந்தது. இந்நிலையில் கடந்த 2 மாதங்களாக 40 பேருக்கு திடீரென எந்தவித அறிவிப்புமின்றி உதவித்தொகை நிறுத்தப்பட்டுள்ளது. தரங்கம்பாடி வட்ட சமூக பாதுகாப்பு தனி வட்டாட்சியர் திருமாறன் இதுகுறித்து எந்தவித நடவடிக்கையும் எடுக்கவில்லை. இப்போது வட்டாட்சியரும் நடவடிக்கை எடுக்க மறுத்தால், போராட்டத்தில் ஈடுபடுவோம் என்றார்.
கடந்த 2 மாதங்களாக உதவித்தொகை இல்லாததால் அன்றாட உணவுக்கே வழியின்றி பிறரிடம் கையேந்தும் நிலைக்கு வந்து விட்டதாகவும், கணவர், பிள்ளைகள் யாருமே இல்லாததால் ஆதரவின்றி நிர்கதியாகி இருப்பதாகவும் வயதுமுதிர்ந்த சரோஜா, அஞ்சம்மாள் ஆகியோர் கண்ணீர் மல்க கூறினர்.