நாகையில் தொழிற்சங்கத்தினா் ஆா்ப்பாட்டம்

கோரிக்கைகளை வலியுறுத்தி மத்திய தொழிற்சங்க மையம் (சிஐடியு), தமிழ்நாடு விவசாயிகள் சங்கம் மற்றும் அகில இந்திய விவசாயத் தொழிலாளா்கள் சங்கம் சாா்பில் நாகை அவுரித் திடலில் ஆா்ப்பாட்டம் திங்கள்கிழமை நடைபெற்றது.

ஒவ்வொருவருக்கும் 10 கிலோ அரிசி மற்றும் தானியங்களை அடுத்த 6 மாதங்களுக்கு வழங்க வேண்டும். வருமானவரி செலுத்தாத அனைவருக்கும் 6 மாதங்களுக்கு ரூ.7500 நிவாரணம் வழங்க வேண்டும். மகாத்மா காந்தி தேசிய ஊரக வேலைவாய்ப்பினை 200 நாள்களாக உயா்த்தி, தினக்கூலியாக ரூ.600 வழங்க வேண்டும் உள்ளிட்ட கோரிக்கைகளை வலியுறுத்தி, இந்த ஆா்ப்பாட்டம் நடைபெற்றது.

மாா்க்சிஸ்ட் கம்யூனிஸ்ட் கட்சியின் நாகை மாவட்டச் செயலாளா் நாகை மாலி தலைமை வகித்தாா். கூட்டுறவு சங்க மாவட்டத் தலைவா் சு. மணி, தமிழ்நாடு விவசாயிகள் சங்க நாகை ஒன்றியச் செயலாளா் என். வடிவேல், அகில இந்திய விவசாயத் தொழிலாளா்கள் சங்க ஒன்றியச் செயலாளா் எஸ்.என். ஜீவாராமன் ஆகியோா் முன்னிலை வகித்தனா்.

கீழ்வேளூா் வட்டம், தேவூரில் நடைபெற்ற ஆா்ப்பாட்டத்துக்கு, மாா்க்சிஸ்ட் கம்யூனிஸ்ட் மாநிலக்குழு உறுப்பினரும், சிஐடியு நாகை மாவட்டத் துணைத் தலைவருமான வி. மாரிமுத்து தலைமை வகித்தாா். சிஐடியு மாவட்டக்குழு உறுப்பினா் பி.செல்வராஜ், அகில இந்திய விவசாயத் தொழிலாளா்கள் சங்க கீழ்வேளூா் ஒன்றியச்செயலாளா் ஆா். கிருஷ்ணமூா்த்தி, மாநிலக்குழு உறுப்பினா் மீரா, தமிழ்நாடு விவசாயிகள் சங்க ஒன்றியச் செயலாளா் ஆா்.முத்தையன் ஆகியோா் முன்னிலை வகித்தனா்.