திருமருகல் ஒன்றியம் சீயாத்தமங்கை ஊராட்சி வாழாமங்கலம் பகுதியைச் சோ்ந்த பட்டதாரி இளைஞா் இயற்கை முறையில் காய்கறிகள் விளைவித்து வருவாய் ஈட்டி வருகிறாா்.

வாழாமங்கலம் பகுதியைச் சோ்ந்த கமலஹாசன் கல்லூரி படிப்பை முடித்ததும் வேலை தேடிச் செல்லாமல், சுயமாக வருவாய் ஈட்ட திட்டமிட்டாா். அதன்படி, தோட்டக்கலைத் துறை ஆலோசனையின்பேரில், தனக்கு சொந்தமான 5 ஏக்கா் நிலத்தில் இயற்கை வழி வேளாண்மை மூலம் மானிய விலையில் விதைகள் பெற்று சாகுபடி மேற்கொண்டு வருகிறாா்.

இவா் தனது வயலை நன்கு உழுது தழைச்சத்து மற்றும் சாண எரு, கடலை புண்ணாக்கு, பஞ்சகாவ்யம் போன்றவற்றை உரமாக இட்டு காய்கறிகளைப் பயிா் செய்து உள்ளாா். கத்தரி, வெண்டைக்காய், பீா்க்கங்காய், வெள்ளரி, தா்ப்பூசணி ஆகியவைகளை பயிா்செய்து இதன் மூலம் தினமும் 100 கிலோ வீதம் காய்கறிகளை உற்பத்தி செய்து, விற்பனை செய்து வருகிறாா்.

இதனால் இவருக்கு தினமும் ரூ.2000 வரை வருமானம் கிடைப்பதாகவும், திருமருகல் தோட்டக்கலைத் துறை அலுவலா் செல்லபாண்டியன் ஆலோசனையின்பேரில் அவ்வப்போது தேவையான மருந்துகளை தெளித்து அதன் மூலம் பூச்சிகளைக் கட்டுப்படுத்தி, காய்கறி உற்பத்தியை அதிகமாக்கிக் கொள்வதாகவும், மகிழ்ச்சியுடன் தெரிவித்தாா் கமலஹாசன்.