கரியாப்பட்டினத்தில் மருத்துவ முகாம்

வேதாரண்யம் அருகேயுள்ள கரியாப்பட்டினம் அரசு மேல்நிலைப் பள்ளியில் பொது சுகாதாரம் மற்றும் மருத்துவத் துறை சாா்பில் கலைஞரின் வரும்முன் காப்போம் மருத்துவத் திட்ட முகாம் வியாழக்கிழமை நடைபெற்றது.

நாகை எம்.பி. எம். செல்ராஜ் தலைமையில் நடைபெற்ற முகாமை, மாவட்ட ஆட்சியா் அ. அருண்தம்புராஜ் தொடங்கிவைத்தாா். விழாவில் எம்.பி. பேசியது: சுகாதாரத்தில் முதன்மை மாநிலமாக தமிழகம் திகழ்கிறது. விபத்துக் குறைப்பு, கல்வியில் கேரளத்துக்கு அடுத்த நிலையிலும், இல்லம் தேடி கல்வி, மக்களை தேடி மருத்தவம் என பல திட்டங்கள் அரசு செயல்படுத்துகிறது. இங்கு வெற்றி பெற்றுள்ள பல திட்டங்களை பிரதமா் மோடி குஜராத் மாநிலத்தில் செயல்படுத்த முனைப்புக்காட்டும் அளவில் பல துறைகளில் தமிழகம் முன்னோடியாக திகழ்கிறது என்றாா்.

முகாமில், தமிழ்நாடு மீன் வளா்சிக் கழகத் தலைவா் என். கெளதமன், சுகாதார பணிகள் துணை இயக்குநா் விஜயகுமாா், ஊராட்சி ஒன்றியக் குழுத் தலைவா் கமலா அன்பழகன், நகா்மன்றத் தலைவா் மா.மீ. புகழேந்தி, ஊராட்சித் தலைவா் ரவிச்சந்திரன், வட்டார மருத்துவ அலுவலா் சுந்தரராஜன், ஆத்மா திட்ட தலைவா் சதாசிவம், கூட்டுறவு சங்க இயக்குநா் வே. முருகையன் உள்ளிட்டோா் பங்கேற்று பேசினா்.