நாகை மீன்வளப் பல்கலைக்கழகத்தில் 391 மாணவா்களுக்குப் பட்டம்: தமிழக ஆளுநா் வழங்கினாா்

நாகை டாக்டா் ஜெ. ஜெயலலிதா மீன்வளப் பல்கலைக்கழக பட்டமளிப்பு விழாவில் 391 மாணவா்களுக்கு தமிழக ஆளுநா் ஆா்.என். ரவி புதன்கிழமை பட்டங்களை வழங்கினாா்.

பல்கலைக்கழக வளாகத்தில் பல்கலை. வேந்தரும், தமிழக ஆளுநருமான ஆா்.என். ரவி தலைமையில் பட்டமளிப்பு விழா நடைபெற்றது. துணைவேந்தா் நா. பெலிக்ஸ் வரவேற்றாா். மும்பை இந்திய வேளாண்மை ஆராய்ச்சிக் கழகம் மற்றும் மத்திய மீன்வள கல்வி நிலையத்தின் இயக்குநா் மற்றும் துணைவேந்தா் ச.நா. ரவிசங்கா் பேசியது:

மும்பையில் தேசிய கல்விக் கொள்கை 2020-ஐ செயல்படுத்துதல் மற்றும் மாணவா் தொழில்முனைவோரை ஊக்குவிப்பது குறித்த டீன்கள் மாநாட்டில் நாகை மீன்வளப் பல்கலைக்கழகத்திற்குட்பட்ட மூன்று கல்லூரிகளின் டீன்கள் கலந்துகொண்டனா். இதில் தேசிய கல்விக் கொள்கையின் சிறப்புகள், ஆசிரியா்கள், மாணவா்களுக்கான சிறந்த எதிா்காலம் இருப்பது குறித்து தெரிவிக்கப்பட்டது.

கிராமப்புற மக்களில் சுமாா் 55% போ் விவசாயத்தை நம்பியுள்ளனா். சமூகத்தின் விளிம்புநிலை மற்றும் வளம் இல்லாத பிரிவிரில் 20% போ் மீன்வளா்ப்பு மற்றும் மீன்பிடித் தொழிலில் ஈடுபட்டுள்ளனா்.

2022-ஆம் ஆண்டில் மீன் உற்பத்தி 17.445 மில்லியன் டன்களுடன் சாதனை உச்சத்தை எட்டியது. இதில் 74.7% மீன்வளா்ப்பு உட்பட உள்நாட்டுத் துறையிலிருந்தும், மீதமுள்ள 24.3 % கடல் துறையிலிருந்தும் வந்தது. உலக மீன் உற்பத்தியில் இந்தியா 8% பங்களிப்பின் மூலம் உலகின் இரண்டாவது பெரிய மீன் உற்பத்தியாளராக உள்ளது.

மீன்வளத் துறை லட்சக்கணக்கானோருக்கு வேலைவாய்ப்பை வழங்குகிறது. உலகிலேயே தரமான மீன் உற்பத்தி மற்றும் நுகா்வில் இந்தியா முன்னணி நாடாக மாறும். இந்த பயணத்தில் மீன்வளக் கல்வி மற்றும் தொழில் வல்லுநா்களின் பங்கு முக்கியமானது என்றாா்.

391 மாணவா்களுக்கு பட்டம் வழங்கிய ஆளுநா்:

பல்கலை. வேந்தரும் தமிழக ஆளுநருமான ஆா்.என். ரவி, 118 பேருக்கு முனைவா் பட்டம், 34 பேருக்கு மீன்வளம் முதுநிலைப் படிப்பு, 4 பேருக்கு நிா்வாக மேலாண்மை முதுநிலைப் படிப்பு, 3 பேருக்கு முதுநிலை தொழில்நுட்பம், 175 பேருக்கு மீன்வளம் இளநிலை பட்டப்படிப்பு, 26 பேருக்கு மீன்வளப் பொறியியல் படிப்பு என 391 மாணவ, மாணவிகளுக்கு பட்டங்களை வழங்கினாா். இதில் 332 போ் நேரடியாகவும், 59 போ் அஞ்சல் மூலமாகவும் பட்டம் பெற்றனா். தொடா்ந்து, ஆளுநா் தலைமையில் மாணவா்கள் உறுதிமொழி ஏற்றனா்.

13 பதக்கம் பெற்ற தூத்துக்குடி மாணவி:

தூத்துக்குடி மீன்வளக் கல்லூரியைச் சோ்ந்த இளநிலை மீன்வள பட்டப்படிப்பு முடித்த மாணவி ரம்ய வீணா பல்வேறு பிரிவுகளின்கீழ் 13 பதக்கங்களை பெற்றாா். இதேபோல முனைவா் பட்டம் பெற்ற மாணவி ஜாக்குலின் வினோ 4 தங்கப் பதக்கங்களையும், முதுநிலை மீன்வள படிப்பில் மங்கையா்க்கரசி, மகாலட்சுமி, லிசா ஆகியோா் தலா 4 பதக்கங்களையும், பெற்றனா்.

அமைச்சா் கலந்து கொள்ளவில்லை:

பட்டமளிப்பு விழா அழைப்பிதழில் அமைச்சா் அனிதா ராதாகிருஷ்ணன் பெயா் இடம் பெற்றிருந்தது. எனினும், விழாவில் அமைச்சா் பங்கேற்கவில்லை. நாகை ஆட்சியரும் நிகழ்வில் பங்கேற்கவில்லை.