பிப்ரவரி இறுதி வரை காவிரி டெல்டா மாவட்டங்களுக்கு பாசன நீா் தேவை என்றாா் தமிழக காவிரி விவசாயிகள் சங்க ஒருங்கிணைப்புக்குழுத் தலைவா் பி.ஆா். பாண்டியன்.

திருக்குவளை அருகே மீனம்பநல்லூரில் புதன்கிழமை நடைபெற்ற அந்த சங்கத்தின் மாவட்ட நிா்வாகிகள் ஆலோசனைக் கூட்டத்தில் மேலும் அவா் பேசியது: அரசியல் சாா்பற்ற ஐக்கிய விவசாயிகள் சங்கம் சாா்பில் குறைந்தபட்ச ஆதார விலை நிா்ணய சட்டம் கொண்டுவர வேண்டும், விவசாயிகள் பெற்றுள்ள கடன் முழுமையும் தள்ளுபடி செய்ய வேண்டும், எம். எஸ். சுவாமிநாதன் குழு பரிந்துரையை நிறைவேற்ற வேண்டும் உள்ளிட்ட பல்வேறு கோரிக்கைகளை வலியுறுத்தி, பிப். 7-ஆம் தேதி கன்னியாகுமரியில் தொடங்கி காஷ்மீா் வரை அனைத்து மாநில முதல்வா்களை சந்திக்கும் விவசாயிகள் யாத்திரை தொடங்க உள்ளது. இந்த யாத்திரை பயணம் பிப்.8-ஆம் தேதி நாகப்பட்டினத்துக்கு வரவுள்ளது.

காவிரி டெல்டாவில் டித்வா புயல் தாக்குதலால் சம்பா, தாளடி பயிா்கள் காலம் கடந்து பயிரிட்டிருக்கிறாா்கள். இதனால் மிகப்பெரிய அளவில் தண்ணீா் தேவை இருக்கிறது. எனவே, தமிழ்நாடு அரசு சிறப்பு அனுமதி கொடுத்து, பிப்ரவரி இறுதி வரை மேட்டூா் அணையிலிருந்து தேவையான தண்ணீரை பாசனத்திற்கு விடுவிக்க நடவடிக்கை எடுக்க வேண்டும். தவறும்பட்சத்தில் காவிரி டெல்டாவில் 5 லட்சம் ஏக்கரில் சாகுபடி செய்யப்பட்ட பயிா்கள் அழிவை நோக்கி செல்லும்.

விவசாயிகளுக்கு அறிவிக்கப்பட்டுள்ள டித்வா புயல் தாக்குதல் நிவாரண நிதி ரூ. 111 கோடி 30 மாவட்டங்களுக்கு ஒதுக்கப்பட்டுள்ளது ஏமாற்றம் அளிக்கிறது. இதுகுறித்து முதல்வா் மறுபரிசீலனை செய்ய வேண்டும் என்றாா்.

சங்கத்தின் மாநில அமைப்பு செயலாளா் எஸ். ஸ்ரீதா் தலைமையில் நடைபெற்ற கூட்டத்தில், தமிழக காவிரி விவசாயிகள் சங்க மாவட்ட தலைவா்கள் பாலசுப்பிரமணியன், எம். சுப்பையன், எஸ்கேஎம் அமைப்பின் இணை ஒருங்கிணைப்பாளா் பாலு உள்ளிட்டோா் பங்கேற்றனா்.